ەلىمىز تاۋەلسىزدىگىنىڭ 30 جىلدىق داتالى مەرەكەسى اياسىندا, مادەنيەت جانە سپورت مينيسترلىگى «ادالدىق الاڭى» جوبالىق كەڭسەسىنىڭ پاراساتتىلىق مادەنيەتىن ىلگەرلەتۋگە ارنالعان ۆەدومستۆوارالىق ءىس-شارالار جوسپارى بويىنشا, ەلورداداعى ۇلتتىق كىتاپحانادا «مەيىرىم ءپالساپاسى» اتتى تۋىندىنىڭ تۇساۋى كەسىلىپ, اتالمىش شاراعا پارلامەنت سەنات جانە ءماجىلىس دەپۋتاتتارى, ەلىمىزگە تانىمال عالىمدار, سونداي-اق زيالى قاۋىم وكىلدەرى قاتىستى.
ماڭىزدى شارانى اشىپ ءسوز سويلەگەن مادەنيەت جانە سپورت ۆيتسە-ءمينيسترى نۇرعيسا داۋەشوۆ ءوز سوزىندە: ««ادام ءناسىلىن جەر بەتىندە باياندى ەتىپ تۇرعان بىردەن-ءبىر كۇش مەيىرىم مەن راقىم» دەپ بەلگىلى قوعام قايراتكەرى, جازۋشى ءابىش كەكىلباي ايتقانىنداي, بۇگىنگى تۇساۋى كەسىلىپ وتىرعان تۋىندى ادامداردىڭ رۋحىن وياتىپ, ىزەتتىلىكتى, ىزگىلىكتى دارىپتەۋدە ۇلگى-ونەگە بولارى انىق. تۋىندى اۆتورى ۇزبەن قۇرمانباي ۇلى زەينەتكەرلىك جاسىنا قاراماي, تىنىمسىز ەڭبەك ەتىپ, قوعامنىڭ دامۋىنا ۇلەس قوسىپ كەلە جاتقانى قۋانتارلىق», دەپ يگى نيەتىن ءبىلدىردى.
وسى رەتتە تۇساۋى كەسىلىپ وتىرعان تۋىندىنىڭ مازمۇنىنا توقتالساق: جەتى بولىمنەن تۇراتىن ەڭبەكتە اۆتور مەيىرىمدى قوعام قۇرۋعا قاتىستى نەگىزگى فاكتورلاردى تۇگەل جۋىق قامتي العان. ءبىرىنشى بولىمىندە جاراتۋشىنىڭ مەيىرىمدىلىك زاڭدىلىعىنا نەگىزدەلگەن مەيىرىم ءپالساپاسىنىڭ ماڭىزىنا توقتالىپ, ونىڭ كۇللى ادامزات بالاسىن باقىتقا, بايلىققا باستايتىن اق جول ەكەنىن ايقىنداۋعا كوڭىل بولىنگەن.
ەكىنشى بولىمدە, بۇگىنگى ءومىر ءسۇرىپ وتىرعان قوعامىمىزداعى سىبايلاستىق, جەمقورلىق كەلەڭسىزدىكتەرگە تالداۋ جاساي وتىرىپ, حالىقتى, اۋەلگى كەزەكتە مەملەكەتتىك قىزمەتتەگى لاۋازىم يەلەرىنە مەيىرىم, ىزگىلىك قالىپتاستىرۋ جولدارىن قاراستىرادى.
ءۇشىنشى بولىمدە, ىزگىلىك تۇرعىسىنداعى الەمدىك ويشىلدار مەن قازاق دانالىعىنىڭ ءبىر-بىرىمەن ۇشتاسىپ جاتقانىن دالەلدەي وتىرىپ, قازاق ءپالساپاسىن ءبىزدىڭ تاۋەلسىز مەملەكەتىمىزدى قورعاپ ساقتاۋدىڭ, دامىتۋدىڭ كىلتى رەتىندە قاراستىرادى.
ءتورتىنشى بولىمدە, مەملەكەت پەن حالىق اراسىنداعى ءوزارا بايلانىسىن نىعايتۋدىڭ جولدارى قاراستىرىلادى. ال كەلەسى بولىمدەردە بۇگىنگى قوعامداعى باستى كەمشىلىك – قوعامدىق قاتىناستاعى الاۋىزدىق, باقتالاستىق, كورە الماستىق سياقتى جات پيعىلداردىڭ سالدارى, مۇنى جويۋدىڭ جولدارى, ۇلتتىق ءتىلىمىزدىڭ مەملەكەت قالىپتاستىرۋداعى ءرولى تۋرالى ايتىلادى.
كىتاپتىڭ سوڭعى بولىمىندە اۆتور مەيىرىمدى قوعام قۇرۋدىڭ ىرگەتاسى رەتىندە «نۇر-سۇلتان قالاسىن مەيىرىمدى قالاعا اينالدىرۋدىڭ تۇجىرىمداماسىن» ۇسىنادى. «جاراتقاننان بەرىلگەن مەيىرىمدىلىك زاڭدىلىعىن, ونى دارىپتەگەن ۇلتىمىزدىڭ بۇرىنعى-سوڭعى ويشىلدارىنىڭ يدەياسىن ومىردە جۇزەگە اسىرۋ, قالىپتاستىرۋ ارقىلى قوعامدىق قاتىناستاعى كىناراتتىڭ بارىنەن ايىعۋعا, قوعامدى تۇزەۋگە بولادى», دەگەن يدەيانى نەگىز ەتكەن بۇل كىتاپ الداعى كۇندەرى وقىرماندارىنان ءوز باعاسىن الارى ءسوزسىز.