فرانتسۋزدىق «TiJi» بالالار تەلەارناسىنىڭ كونتەنتى قازاق تىلىنە اۋدارىلاتىن بولادى, دەپ حابارلايدى Egemen.kz.
27 قىركۇيەك كۇنى «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ كەڭسەسىندە باسقارما توراعاسى اسىلبەك ەسەنباەۆ فرانتسۋزدىق «Tiji» بالالار تەلەۆيزيالىق ارناسىنىڭ وكىلدەرىمەن كەزدەسۋ وتكىزدى. كەزدەسۋ بارىسىندا تاراپتار الەمگە تانىمال بالالار كونتەنتىن قازاق تىلىنە اۋدارۋ ماسەلەلەرىن تالقىلادى.
فرانتسۋز تاراپىنان كەزدەسۋگە «M6 Thématique»كومپانياسىنىڭ تەلەارنالار مەن راديوستانتسيالار پورتفەلىن حالىقارالىق ديستريبۋتسيالاۋ جونىندەگى ديرەكتورى جان-رەنە وكۋتيۋرە جانە «M6 Thématique» حالىقارالىق ديستريبۋتسيا جونىندەگى ديرەكتورى, «لتي ۆوستوك» جشق باس ديرەكتورى ماريا جابينا-پانتەليك قاتىستى.
كەزدەسۋ بارىسىندا اسىلبەك ەسەنباەۆ ققدي-نىڭقىزمەتى تۋرالى جانە ينستيتۋت قابىرعاسىندا مەكتەپكە دەيىنگى جانە مەكتەپ جاسىنداعى بالالاردى رۋحاني-ادامگەرشىلىك تاربيەلەۋ بويىنشا ازىرلەنگەن ستراتەگيالىق جوسپارلارى تۋرالى بايانداپ بەردى.
اتاپ ايتقاندا, تاراپتار تەلەارنانىڭ تانىمال مۋلتيپليكاتسيالىق كونتەنتىن قازاق تىلىنە اۋدارۋ ماسەلەلەرىن تالقىعا سالدى.
ءوز كەزەگىندە جان-رەنە وكۋتيۋرە «TiJi» تەلەارناسى قازاقستانمەن ىنتىماقتاستىق ورناتۋعا قۋانىشتى ەكەنىن اتاپ ءوتىپ, تەلەارنانىڭ قىزمەتى مەن پەرسپەكتيۆالى جوبالار تۋرالى اقپاراتتارىمەن بولىستى. ول بالالار ارناسىنىڭ مازمۇندىق تورى الەۋمەتتىك جەلىلەرمەن سالىستىرعاندا بالالار ءۇشىن قاۋىپسىز ەكەندىگىنە دە ەرەكشە نازار اۋداردى. «TiJi» اتا-انالارعا دا نازار اۋدارادى. ماسەلەن, تەلەارنا تورىندا پسيحولوگتار, نەيروبيولوگتار جانە مۇعالىمدەردى قامتىعان باعدارلامالار دا بار.
ء«بىز جۇزەگە اسىرۋدى جوسپارلاپ وتىرعان جوبا مەملەكەتتىك تىلدەگى بالالار ءۇشىن ساپالى ويىن-ساۋىق كونتەنتىن ارتتىرۋ ءۇشىن ماڭىزدى. بۇل «رۋحاني جاڭعىرۋ» باعدارلاماسىنىڭ 2021 جىلعا ۇلتتىق جاڭعىرۋ كەزەڭىنە كوشۋى بويىنشا جول كارتاسىندا بەلگىلەنگەن باسىم باعىتتاردىڭ ءبىرى», دەپ اتاپ ءوتتى كەزدەسۋ قورىتىندىسى بويىنشا ققدي باسقارما توراعاسى اسىلبەك ەسەنباەۆ.