ەرتەڭ كاتاردىڭ استاناسى – دوحادا ۇستەل تەننيسىنەن ەرلەر مەن ايەلدەر اراسىنداعى ازيا چەمپيوناتى باستالادى, دەپ حابارلايدى Egemen.kz.
5-قازانعا دەيىن سوزىلاتىن جارىستا 200-گە تارتا ويىنشى باق سىنايدى. ولار ەرلەر, ايەلدەر, جۇپتىق جانە ارالاس جۇپتار اراسىندا وتەتىن جارىستاردىڭ جۇلدەلەرىن ساراپقا سالادى. بايراقتى باسەكەدە قازاقستاننىڭ سەگىز سپورتشىسى ونەر كورسەتەدى. سولاردىڭ اراسىنان كيريلل گەراسيمەنكوعا ايرىقشا سەنىم ارتامىز. ول وليمپيا ويىندارى مەن الەم چەمپيوناتتارىنا, كوپتەگەن حالىقارالىق تۋرنيرلەرگە قاتىسىپ مول تاجىريبە جيعان ۇستەل تەننيسشىسى. بۇل كۇندەرى جەرلەسىمىز الەمدىك رەيتينگتە 45-ورىندا تۇر. بيىلعى ەل چەمپيوناتىندا ءتورت التىندى ولجالاعان 15 جاسار الان قۇرمانعاليەۆتىڭ دە مۇمكىندىگى جوعارى باعالانۋدا. سونداي-اق, دوحاداعى دودادا ايدوس كەنجەعۇلوۆ, يريسبەك ارتۋكمەتوۆ, سارۆينوز ميركاديروۆا, اناستاسيا لاۆروۆا, زاۋرەش اقاشەۆا جانە انەل باقىت سىندى ويىنشىلار ءوز ونەرلەرىن ورتاعا سالادى.
بىردەن ايتا كەتەيىك, ازيا بىرىنشىلىگىندە ۇزدىكتەر ساناتىنان كورىنۋ وتە قيىن شارۋا. سەبەبى, الەمدىك رەيتينگتە العاشقى التى ورىندى يەلەنىپ وتىرعاندار ءداپ وسى سارى قۇرلىقتىڭ وكىلدەرى. جانە دە بۇگىنگى تاڭدا «توپ-50» ويىنشىنىڭ ساناتىنا ەنگەندەردىڭ تەڭ جارتىسى ازيالىقتار ەكەنىن ەستەن شىعارماعان ءجون.