ستراتەگيادان تۋىندايتىن مىندەتتەر

اقتاۋدا وتكەن اكتيۆ جيىنىنىڭ باستى تاقىرىبىنا اينالدى

ەل اراسىندا ءجيى جۇرەتىندىك­تەن سوڭ پىكىرلەرگە دە قانىقپىز. جۇرت­شىلىق بيىلعى جولداۋدىڭ جىلداعىلاردان ەرەكشە بولعان­دى­عىن ايتۋدا. ولار جولداۋدىڭ كەڭ ايتىلىپ, تەز تارالۋىن حالىققا جاعىمدى ەستىلىپ, وڭتايلى كەلگەن تۇستارى از ەمەس ەكەندىگىمەن تۇسىندىرەدى جانە ءوز كەزەكتەرىندە پىكىرلەرىن ايتۋدان قالىس قالماۋدا. قازاقستان رەسپۋبليكاسى پار­لا­­مەنتى سەناتىنىڭ توراعاسى قا­سىم-جومارت توقاەۆتىڭ مۇنايلى ولكەگە كەشەگى ساپارى ءدال وسىنداي كەزەڭمەن تۇسپا-تۇس كەلدى. توراعا مەم­لەكەت باسشىسىنىڭ «قازاق­ستان جولى – 2050: ءبىر ماقسات, ءبىر ءمۇد­­دە, ءبىر بولاشاق» جولداۋىن حا­لىققا ءتۇسىندىرۋ ماقساتىنداعى سا­پارىن اقتاۋ قالاسىندا وبلىس اك­تيۆىمەن كەزدەسۋمەن باستادى. ال­عاشقى ءسوزدى العان ايماق باسشى­سى اليك ايدارباەۆ استانالىق دەلە­گاتسياعا ماڭعىستاۋ ءوڭىرىنىڭ الەۋ­مەت­تىك-ەكونوميكالىق دامۋ ىرعاعى مەن ەلباسى جولداۋىن ناسيحاتتاۋ, ءتۇسىندىرۋ باعىتىندا جاسالىپ جات­قان­ جۇمىستار بارىسىنان حاباردار ەتتى. جولداۋ جايلى اۋقىمدى بايانداما جاساعان ق.توقاەۆ: – وزدەرىڭىز بىلەسىزدەر, وتكەن جىلى ەلباسى جاريالاعان «قازاق­ستان-2050» ستراتەگياسى جۇزەگە اسىرىلا باستادى. بيىلعى جولداۋ وسى ستراتەگيانىڭ باستى ماقساتى – الەمنىڭ دامىعان 30 ەلىنىڭ قاتارىنا كىرۋدىڭ ناقتى جوسپارىن جان-جاقتى بايانداپ بەردى. بۇل ساناتقا ەنۋىمىز ءۇشىن ءبىز جاھاندىق باسەكەگە توتەپ بە­رۋىمىز كەرەك. ەلىمىزدە تابىسقا جە­تۋدىڭ العىشارتتارى تولىعىمەن قالىپتاسقان. ەلىمىزدىڭ دامۋ دەڭ­گەيى الەمدەگى وڭ ۇردىستەردىڭ بەت­الىسىمەن تولىق سايكەس كەلەدى, – دەپ كۇللى قازاقستاندىقتاردى ۇيىس­تى­رىپ, الىس بولاشاققا باستايتىن «ماڭگىلىك ەل» يدەياسىنا توقتالدى. سەنات توراعاسىنىڭ ايتۋىنشا, ماڭگىلىك ەلگە اينالۋ ءۇشىن ءاربىر قازاقستاندىق تىنباي, ناتيجەلى ەڭبەك ەتۋى قاجەت. تاياۋداعى 15 جىلدا عىلىمعا نەگىزدەلگەن ەكونوميكانى قالىپتاستىرۋ ارقىلى قازاقستاننىڭ تۇراقتى دامۋى قامتاماسىز ەتىلۋى ءتيىس. بۇل مىندەت شىن مانىسىندە يننوۆاتسيالىق سيپاتقا يە, ويتكەنى, ول ەلىمىزدىڭ يندۋستريالىق جاعىنان دامىعان الەمگە كىرۋىن كوزدەيدى. سونداي-اق, جولداۋداعى ۇلتتىق دامۋدىڭ جەتى باسىمدىعىنا توقتالعان ق.توقاەۆ ولاردىڭ ارقايسىسىنىڭ وتە ماڭىزدى ەكەندىگىن جانە كۇردەلى مىندەتتەر جۇكتەيتىندىگىن, سوندىقتان جوسپاردى بەرىك ۇستانىپ, تاپسىرىلعان مىندەتتەردى ورىنداۋعا بارشا بولىپ جانە بارىنشا جۇمىلۋ قاجەتتىگىن ايتتى. مەملەكەتىمىزدىڭ ۇزاقمەرزىمدى دامۋىن قامتاماسىز ەتەتىن «قازاقستان-2050» ستراتەگياسىن جۇزەگە اسىرۋداعى پارلامەنتتىڭ ءرولى تۋرالى ايتقان سەنات توراعاسى اتالعان قۇجاتتى زاڭنامالىق جاعىنان ساپالى قامتاماسىز ەتۋ مىندەتى تۇرعانىن اتاپ ءوتتى. – مەملەكەتتىڭ ساياسي جۇيەسىندەگى پارلامەنتتىڭ الاتىن ورنى ەرەكشە. باسقا ەلدەرمەن, ونىڭ ىشىندە كەيبىر دەموكراتيالىق ەلدەرمەن سالىستىرعاندا, ەلىمىزدىڭ زاڭ شىعارۋشى ورگانىنا ەلەۋلى وكىلەتتىكتەر بەرىلگەن, – دەگەن قاسىم-جومارت كەمەل ۇلى پارلامەنتتىڭ جوعارعى پالاتاسىنىڭ جەرگىلىكتى بيلىك ورگاندارىمەن ءوزارا تىعىز ءىس-قيمىلى, سەناتتىڭ نەگىزگى قۇرامى وڭىرلەردىڭ وكىلدەرىنەن قۇرالاتىنىن ايتا كەلىپ, «وڭىرلەردىڭ مۇددەسى ءدال وسى سەناتتا ءتيىمدى ەسكەرىلەدى», دەدى. سەناتتا وڭىرلەردى دامىتۋ جانە ۇلتتىق زاڭنامانى جەتىلدىرۋ بويىنشا مەملەكەتتىك ساياساتتى, پرەزيدەنتتىڭ باستامالارىن ءتۇسىندىرۋ مەن ناسيحاتتاۋ ماقساتىنداعى «ءوڭىر» دەپۋتاتتىق توبىنىڭ جۇمىس ىستەيتىندىگىن ايتىپ, 2013 جىلى پارلامەنت سەناتى اتقارعان جۇمىستار بارىسىن جانە جاقىن ۋاقىتتا اتالعان ستراتەگيانى جۇزەگە اسىرۋعا قاتىستى قارالاتىن زاڭ جوبالارى بار ەكەندىگىن اتاپ كورسەتتى. جولداۋداعى يننوۆاتسيالىق يندۋستريا­لاندىرۋ, اگروونەركاسىپتىك كەشەننىڭ تيىمدىلىگىن ارتتىرۋ, اگلومەراتسيانى, كولىكتىك ينفراقۇرىلىم مەن ەنەرگەتيكانى, شاعىن جانە ورتا كاسىپكەرلىكتى دامىتۋ, مەملەكەتتىك ينستيتۋتتار قىزمەتىن جەتىلدىرۋ تۋرالى ايتا كەلىپ, عىلىمعا نەگىزدەلگەن ەكونوميكا قۇرۋ تۋرالى تاپسىرماعا ارنايى توقتالدى. ماڭعىستاۋ – جان باسىنا شاققانداعى جالپى ءونىمنىڭ كورسەتكىشى بويىنشا ەلىمىزدەگى ەڭ جوعارى ايماقتاردىڭ ءبىرى. مۇناي مەن گازدىڭ اسا باي قورى بار, ەلىمىزدەگى مۇنايدىڭ تورتتەن ءبىر بولىگى وندىرىلەتىن, ءىرى وتاندىق جانە شەتەلدىك كومپانيالاردىڭ قارجىلىق مۇددەلەرى شوعىرلانعان ماڭعىستاۋدىڭ مۇنايى مەن گازىنىڭ قۇرامداس بولىكتەرى الەمدە ەڭ كوپ سۇرانىسقا يە بولىپ وتىرعان ونەركاسىپ – مۇناي-حيميا سالاسىن دامىتۋ ءۇشىن ناقتى مۇمكىندىكتەر تۋعىزادى. سول كۇنى سەنات توراعاسى, «نۇر وتان» پارتياسى ساياسي كەڭەسى بيۋروسىنىڭ مۇشەسى ق.توقاەۆ «نۇر وتان» پارتياسى وبلىستىق فيليالىنىڭ مۇشەلەرىمەن, «جاس وتان» وكىلدەرىمەن كەزدەسىپ, پارتيا مۇشەلەرى الدىنا ن.نازارباەۆتىڭ جىل سايىنعى جولداۋىندا جانە «نۇر وتاننىڭ» XV سەزىندە ايتقان تاپسىرمالارىن ورىنداۋ جونىندە بىرقاتار مىندەتتەر قويدى. پارتيانىڭ مەملەكەت باسشىسى العا قويعان مىندەتتەردى ىسكە اسىرۋعا قوعامدى جۇمىلدىرۋعا, تۇسىندىرمە جۇمىستارىن جۇرگىزۋگە مىندەتتىلىگىمەن قاتار, قاراپايىم ادامداردىڭ ناقتى ماسەلەلەرىن شەشۋ, ولاردىڭ قۇقىقتارىن قورعاۋ, مۇمكىندىگى شەكتەۋلى ازاماتتارعا جاسالاتىن قامقورلىق, سىبايلاس جەمقورلىقپەن كۇرەس جونىندەگى جۇمىستاردىڭ ماڭىزدىلىعىن اتاپ كورسەتتى. ق.توقاەۆ ش.ەسەنوۆ اتىنداعى كاسپي مەملەكەتتىك تەحنولوگيا جانە ينجينيرينگ ۋنيۆەرسيتەتىنىڭ ستۋدەنتتەرى جانە پروفەسسورلىق-وقىتۋشىلار قۇرامىمەن, «ماگابرەد» جشس نان زاۋىتىنىڭ ەڭبەك ۇجىمىمەن كەزدەستى. سەنات توراعاسىنىڭ سوزىنە پىكىر قوسقان جەرگىلىكتى ازاماتتار ۇسىنىستارىن دا ۇمىت قالدىرعان جوق. جوعارعى پالاتا توراعاسى ۇسىنىستاردى اياقسىز قالدىرماۋعا تىرىساتىندىعىن جەتكىزدى.  گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى