قاراعاندى وبلىسىندا اۋىل شارۋاشىلىعىنا بولىنەتىن مەملەكەتتىك سۋبسيديانى اتالعان سالاعا مۇلدە قاتىسى جوق كاسىپكەرلەر الىپ كەلگەن, دەپ جازادى Egemen.kz.
وسىلايشا 18 ميلليون تەڭگەگە جۋىق مەملەكەت قارجىسى ءتيىستى باعىتقا جۇمسالماعان. ولقىلىقتى سىبايلاس جەمقورلىققا قارسى قىزمەت ماماندارى انىقتاپ وتىر. كەيبىر شارۋالاردىڭ ءبىر عانا تەحنيكا ءۇشىن مەملەكەتتەن ەكى مارتە سۋبسيديا العان.
بۇدان بولەك, ءتيىستى قۇجاتتارىن تولىق تاپسىرماستان, قىرۋار قارجى العان جايتتار دا كوزگە ىلىككەن. قازىر ۆەدومستۆونىڭ ساراپشىلارى مەن اۋىل شارۋاشىلىعى مينيسترلىگىنىڭ ماماندارى فەرمەرلەردى قارجىلاندىرۋ پروتسەدۋراسىنداعى سىبايلاس جەمقورلىق ارەكەتتەرىن جويۋ بويىنشا جۇمىس جۇرگىزىپ جاتىر.
«پاسپورت بويىنشا قاراساق ءبىر عانا كومباين ساتىپ الىنعان. ال ونىڭ ەكى بىردەي مەنشىك يەسى بار. دەمەك ءبىر تەحنيكاعا ەكى رەت سۋبسيديا بولىنگەن. ياعني بەلگىلى ءبىر كومپانيانىڭ قۇرىلتايشىسى ءبىر تىركەلسە, ونىڭ قىزمەتكەرى رەتىندە تاعى ءبىر زاڭدى تۇلعا تىركەلەدى. بۇل «قولداۋ» پورتالىندا ولقىلىق بار ەكەنىن كورسەتتى. ءبىز پورتال اكىمشىلىگىنە ءتيىستى ۇسىنىستار جولدادىق. سونداي-اق اۋىل شارۋاشىلىعى باسقارماسى مەن مينيسترلىككە دە ەسكەرتپەلەر جولداندى», دەدى وبلىستىق سىبايلاس جەمقورلىققا قارسى قىزمەت باسقارماسىنىڭ جەتەكشىسى باۋىرجان قۇسايىنوۆ.