بۇگىن سەنات 7 جاستان 18 جاسقا دەيىنگى بالالاردى مۇگەدەكتىك توپتارى بويىنشا بولەتىن زاڭدى قابىلدادى. بۇل تۋرالى جوعارعى پالاتانىڭ وتىرىسىندا ءمالىم بولدى, دەپ جازادى Egemen.kz.
مۇگەدەك بالالارعا ارنالعان جاردەماقى كولەمى ارتادى. سالىستىرۋ ءۇشىن, قازىرگى ۋاقىتقا دەيىن بارلىق مۇمكىندىگى شەكتەۋلى بالالار ەڭ تومەنگى كۇنكورىس دەڭگەيىنىڭ 1,4 مولشەرىندە بىردەي جاردەماقى الاتىن. بۇل - 48 023 تەڭگە. ەندى I جانە ءىى توپتاعى 7 جاستان 18 جاسقا دەيىنگى مۇگەدەك بالالار تيىسىنشە 64 860 تەڭگە جانە 54 541 تەڭگە الاتىن بولادى.
بۇدان باسقا, از قامتىلعان وتباسىلاردان شىققان بالالارعا الەۋمەتتىك پاكەت ۇسىنۋ جانە الەۋمەتتىك قىزمەتتەر پورتالى ارقىلى ارناۋلى الەۋمەتتىك قىزمەتتەر كورسەتۋگە كەپىلدىك بەرىلەدى.
«قابىلدانعان زاڭ مۇمكىندىگى شەكتەۋلى ازاماتتاردىڭ, ونىڭ ىشىندە بالالاردىڭ جاعدايىن جاقسارتۋعا, الەۋمەتتىك تەڭسىزدىكتەردى جويۋعا, قولدانىستاعى الەۋمەتتىك قامسىزداندىرۋ جۇيەسىن ودان ءارى جەتىلدىرۋگە ارنالعان. الداعى ۋاقىتتا وسى زاڭ مۇمكىندىكتەرى شەكتەۋلى ازاماتتارىمىزدىڭ جانە مۇگەدەك بالالارى بار وتباسىلاردىڭ قۇقىقتارىن قامتاماسىز ەتۋگە, ولاردىڭ ءومىر ءسۇرۋ ساپاسىن جاقسارتۋعا وڭ اسەرىن تيگىزەدى دەپ سەنەمىز», دەپ اتاپ ءوتتى سەنات توراعاسى ماۋلەن اشىمباەۆ.
تۇرعىن ءۇي قاتىناستارى سالاسىنا دا وزگەرىستەر ەنگىزىلدى. ەندى مۇگەدەك بالا تاربيەلەپ وتىرعان وتباسىلار ءۇشىن جانە ولار 18 جاسقا تولعاننان كەيىن تۇرعىن ءۇي الۋعا كەزەك ساقتالاتىن بولادى.