«قازاقستان» تەلەراديوكورپوراتسياسى قىرعىزستاندىق ارىپتەستەرىمەن بىرلەسىپ, جازۋشى شىڭعىس ايتماتوۆ تۋرالى دەرەكتى فيلم ءتۇسىرىپ جاتىر.
ەسكە سالساق, بىلتىر پاندەميا كەزىندە «قازاقستان» كورپوراتسياسى مادەني-رۋحاني باعىتتاعى Abai TV تەلەارناسىن اشقان ەدى. سودان كەيىن تۇركىتىلدەس, كورشىلەس ەلدەردىڭ تاريحىنا, مادەنيەتىنە قاتىستى ءونىم الماسۋ ماقساتىندا بارلىق مەملەكەت وكىلدەرىنە سۇرانىس-حات جولداندى.
XVII ەۋرازيا مەديافورۋمى اياسىندا بايانداما جاساعان كورپوراتسيا باسشىسى ءلاززات تانىسباي ەكىجاقتى بايلانىستىڭ ناتيجەسىندە قازىر Abai TV ەفيرىنەن تۇركيالىق ارىپتەستەرىمىز دايىنداعان بىرنەشە دەرەكتى فيلم كورسەتىلىپ جاتقانىن ايتتى. ء«بىز ولاردى دۋبلياجداپ, ءوز تىلىمىزدە كورەرمەنگە ۇسىنامىز جانە وزگە ەلدەردىڭ دە ونىمدەرىن قازاق تىلىنە اۋدارىپ, ەفيردەن بەرۋگە دايىن ەكەنىمىزدى جەتكىزگىمىز كەلەدى. تەلەيندۋستريا وتە قارقىندى دامىپ جاتقان قازىرگى كەزدە تەك كونتەنت الماسىپ قانا قويماي, تاجىريبە الماسقانىمىز دا وتە ماڭىزدى دەپ ەسەپتەيمىز. مىسالى, ءبىزدىڭ كورپوراتسيا ماماندارى تۇركيانىڭ وزىق تەلەارنالارىنا ءجيى بارىپ تۇرادى, جاقىندا عانا كورشىلەس قىرعىزستاننىڭ تەلەارنالارىنىڭ باسشىلارى كەلىپ پىكىر الماستى, ستۋديالارىمىزدى كوردى, ورتاق مەموراندۋمعا قول قويدىق. ناتيجەسىندە, قىرعىز تاراپىمەن بىرلەسىپ, ۇلى جازۋشى شىڭعىس ايماتوۆقا ارنالعان دەرەكتى فيلم ءتۇسىرىپ جاتىرمىز», دەدى كورپوراتسيا باسشىسى.
ءفيلمنىڭ نەگىزگى لەيتموتيۆى شىڭعىس ايتماتوۆتىڭ شىعارماشىلىعىنا قۇرىلعان. سونداي-اق جازۋشىنىڭ ەكى ەل اراسىنداعى ادەبي-مادەني بايلانىستى نىعايتۋ جولىندا اتقارعان ەڭبەكتەرى باياندالادى. ءتۇسىرۋ توبى ايتماتوۆتىڭ اۋىلى شەكەردە بولىپ, ونداعى جازۋشىنىڭ شىعارمالارىنا ارقاۋ بولعان دەرەكتى ورىنداردى ءتۇسىرىپ قايتقان. قىرعىز-قازاق بىرلەسكەن دەرەكتى ءفيلمى ەكى ەل اراسىنداعى تاريحي دوستىق قارىم-قاتىناستى ناسيحاتتاۋ ءۇشىن جاسالىپ وتىر.
بۇدان بولەك, ءلاززات تانىسباي Balapan بالالار تەلەارناسى قىرعىز انيماتورلارىمەن بىرلەسىپ, عارىش سالاسى تۋرالى انيماتسيالىق جوبا تۇسىرىلىمىنە دايىندىق باستاعانىن اتاپ ءوتتى. «قازىرگى ۋاقىتتا قازاقستان بۇل سالا بويىنشا بىرقاتار تابىسقا قول جەتكىزدى, ونىمدەرىمىز سىرتقى نارىققا شىعا باستادى. ەلدەگى بالالارعا ارنالعان Balapan تەلەارناسى انيماتسيا ءوندىرىسىنىڭ دامۋىنا ەرەكشە سەرپىن بەرىپ وتىر. جىلىنا 250-300 ءبولىمدى قۇرايتىن 20-25 انيماتسيالىق تۋىندى شىعارىپ وتىرمىز. تۇركىتىلدەس ەلدەردى ءبىرتۇتاس تۇركى تاريحىن كورسەتەتىن انيماتسيالىق جوبالار وندىرىسىنە اتسالىسۋعا شاقىرامىز», دەدى باسقارما توراعاسى.