2021 جىلدىڭ تامىز ايىندا جاڭا اۆتوكولىكتەردى ساتىپ الۋ كورسەتكىشى تومەندەپ كەتكەن. 2020 جىلدىڭ تامىزىمەن سالىستىرعاندا 5,4 پايىزعا ازايعان. بىراق جىلدىق مانگە سالساق, كورسەتكىش – وڭ. جىل باسىنان بەرى 76 039 كولىك ساتىلىپتى. 2020 جىلدىڭ قاڭتار-تامىزىمەن سالىستىرعاندا 42,5 پايىزعا جوعارى.
ساتىلعان 76 مىڭنان استام كولىكتىڭ 73 367-ءسى – جەڭىل جانە جەڭىل كوممەرتسيالىق اۆتوموبيلدەر بولسا, 2 672-ءسى – جۇك كولىكتەرى مەن اۆتوبۋستار ەكەن.
«اۆتوموبيل مەن كومپونەنتتەردى جەتكىزۋ بويىنشا جاعداي ءماز ەمەس, بىراق اۆتوكولىككە دەگەن سۇرانىس ءوسىپ كەلەدى. ديلەرلەر مەن وندىرۋشىلەر قىتاي ارقىلى وتەتىن اۆتوموبيلدەر مەن قۇرامداس بولىكتەردى جەتكىزىپ بەرۋ بويىنشا شەشىمدى كۇتىپ وتىر. جۇكتەردى جىبەرۋ كەزەگى بىرنەشە ايعا سوزىلىپ تۇر. سونىمەن قاتار الەمدىك نارىقتاعى ەلەكتروندى كومپونەنتتەردىڭ تاپشىلىعى اي سايىن سۇرانىس پەن ۇسىنىس اراسىنداعى الشاقتىقتى ۇلعايتىپ جاتىر» دەپ جازادى قازاقستاندىق اۆتوبيزنەس قاۋىمداستىعى.
ال تامىز ايىندا ەڭ كوپ ساتىلعان برەندتەر وندىعىنىڭ كوشىن Chevrolet باستادى – 2 196 دانا. 1 561 دانامەن Hyundai – ەكىنشى ورىندا. ۇزدىك ۇشتىكتى 1 012 دانامەن Toyota تۇيىندەگەن. Kia ديلەرلەرى وتكەن ايدا 825 كولىك ساتسا, Lada – 716, Volkswagen – 356, Nissan – 331, JAC – 328, Renault – 308 جانە BMW 114 اۆتوموبيل ساۋدالاعان.
تامىزداعى توپ-10 مودەل ءتىزىمىنىڭ باسىندا 1 330 ساتىلىممەن Chevrolet Cobalt تۇر. ودان كەيىنگى ورىندا – Chevrolet Nexia (542) جانە Hyundai Accent (499). سونداي-اق تۇتىنۋشىلار تاراپىنان Toyota Camry (437), Hyundai Elantra (326), Lada Largus (282), Hyundai Sonata (255), Hyundai Tucson (243), Kia Rio (243), Toyota Rav4 (213) مودەلدەرىنە دەگەن دە قىزىعۋشىلىق اسا جوعارى بولىپ تۇر.