الەمنىڭ ۇزدىك ۇستازى

قۋانارلىعى, جاھاندىق سىيلىق فينالىنا شىققان­داردىڭ قاتارىنا سەمەي قالاسىنداعى فيزيكا-ماتەماتيكا باعى­تىنداعى نازارباەۆ زياتكەرلىك مەكتەبىنىڭ فيزيكا ءپانى مۇعالىمى اسحات جۇمابەكوۆ تە ەنگەن. بۇل – قازاقستان تاريحىنداعى العاشقى وقيعا. الداعى ۋاقىتتا ول حالىق­ارالىق بايقاۋدا ەل نامىسىن قورعايتىن بولادى.

الەمنىڭ 121 مەملەكەتىنەن سىنعا تۇسكەن مۇعالىمدەر 8 مىڭنان استام نوميناتسيا بويىنشا ىرىكتەلىپ, Global Teacher Prize-2021 سىيلىعىنا ءبىرتابان جاقىندادى. وتىزدا وردا بۇزار ا.جۇمابەكوۆ بۇل مارتەبەگە جەتۋ ءۇشىن 2018 جىلدان بەرى تىنىمسىز ەڭبەك ەتتى. سول جىلى 20 مەكتەپتىڭ ۇستازدارى اراسىندا ءبىرىنشى ورىندى جەڭىپ الىپ, رەسپۋبليكالىق كەزەڭگە وتكەن. ءسويتىپ, ەلىمىزدىڭ «ۇزدىك پەداگوگى» اتاعىنا يە بولعان.

– مەن «الەم مۇعالىمى» جاھاندىق سىيلىعىنا قاتىسۋدى 2020 جىلدىڭ كۇزىندە باستاعانمىن. بايقاۋ بىرنەشە كەزەڭنەن تۇردى. الەمنىڭ ءار قيىرىنان مىڭداعان ءوتىنىش قابىلداندى. وسىدان-اق شارانى ۇيىمداستىرۋشىلاردىڭ اتقارعان جۇمىس­تارىنىڭ از بولماعانىن كورۋىمىزگە بولادى. Varkey قورىنا مەنى ۇزدىك 50 مۇعالىمنىڭ قاتارىنا قوسقاندارى مەن ۇستازدارعا ءدال وسىنداي مۇمكىندىك بەرگەندەرى ءۇشىن العىسىمدى بىلدىرەمىن. قوعامدىق ماڭىزدى باستامالاردى دامىتۋ قورىنىڭ نەگىزىن قالاۋشى ءاليا نۇرسۇلتانقىزى نازارباەۆاعا, قوردىڭ بارلىق قىزمەتكەرلەرىنە «قازاقستان مۇعالىمى» ۇلتتىق سىيلىعىنىڭ باستاماشىسى بولعاندارى ءۇشىن ۇلكەن ريزاشىلىعىمدى بىلدىرەمىن, – دەدى اسحات جۇمابەكوۆ.

سونداي-اق جاس ۇستاز ءوزى قىزمەت ەتەتىن نازارباەۆ زيات­كەرلىك مەكتەبىنىڭ ۇجىمىنا دا العىس ءبىلدىردى. ايتا كەتەرلىگى, مەكتەپتە شاكىرتتەر عانا ءبىلىم الىپ قويمايدى, سونىمەن بىرگە ۇستازداردىڭ دا ءبىلىمى بىرگە شىڭدالارى انىق.

ا.جۇمابەكوۆ – «بولاشاق» باعدارلاماسىنىڭ 2016 جىلعى تۇلەگى. 3 كىتاپتىڭ, 50-دەن استام عىلىمي جۇمىس پەن ماقالانىڭ اۆتورى. ەڭبەكتەرى قازاقستان, رەسەي, فينليانديا, ۇلىبريتانيا, ۋكراينا مەملەكەتتەرىندەگى جۋرنالداردا, جيناقتاردا, گازەتتەردە جارىق كورگەن. شاكىرتتەرى –  «تۋيماادا», وڭتۇستىك كورەيادا وتكەن رەسپۋبليكالىق, حالىق­ارالىق وليمپيادالاردىڭ, عىلىمي جوبالاردىڭ جۇل­دەگەرلەرى. ول ءدارىس بەرگەن تۇلەكتەردىڭ اراسىندا نازارباەۆ ۋنيۆەرسيتەت, گونكونگ پوليتەحنيكالىق ۋنيۆەرسيتەتى, ءابۋ-دابيدەگى نيۋ-يورك ۋنيۆەرسيتەتى, اقش پەن رەسەي جانە ەۋروپانىڭ تانىمال وقۋ ورىندارىنىڭ گرانت يەگەرلەرى بار.

ايتا كەتسەك, «الەم مۇعالىمى» جاھاندىق سىيلىعى ۇستاز­دار­دىڭ قوعامداعى ماڭىزىن ارتتىرا وتىرىپ, ولاردىڭ كۇش-جىگەرىن بۇكىل الەم مويىنداۋعا لايىقتى ەكەنىن كورسەتۋگە ارنالعان.

سەمەي