شىمكەنت قالاسىندا 18 قىركۇيەك World clean up day دۇنيەجۇزىلىك اكتسياسىنا وراي جىل سايىنعى «بىرگە تازا قازاقستان!» ەكولوگيالىق جوباسى اياسىندا جالپىقالالىق سەنبىلىك ءوتتى, دەپ جازادى Egemen.kz.
قالا اكىمىنىڭ باستاماسىمەن قولعا الىنعان تازالىق شاراسىنا مەملەكەتتىك قىزمەتشىلەر, كاسىپكەرلەر, ءتارتىپ ساقشىلارى, شاحار تۇرعىندارى مەن ەرىكتىلەر قاتىستى. ءار مەكەمە وزىنە جۇكتەلگەن اۋماقتى قوقىستان تازالادى.
سەنبىلىككە 12 مىڭعا جۋىق تۇرعىن قاتىستى. 100-دەن اسا ارنايى تەحنيكا جۇمىلدىرىلدى. بارلىعى 165 تەكشە مەتر قوقىس قالا سىرتىنا شىعارىلدى. سونىمەن بىرگە يرريگاتسيالىق ارىقتار تازالانىپ, دەمالىس ورىندارىندا سىرلاۋ جۇمىستارى جۇرگىزىلدى.
وسى كۇنى «جاسىل ەل» جانە «ستۋدەنتتىك قۇرىلىس» جاساقتارىنىڭ ماۋسىمدىق جوباسىنىڭ جابىلۋ سالتاناتى ءوتتى. وندا قالا اكىمىنىڭ ءبىرىنشى ورىنباسارى ش.مۇقان بەلسەندى جاستاردى ماراپاتتادى. بۇل جوبادا قالا بويىنشا 1200-گە جۋىق جاس قامتىلعان.
«قالا كەلبەتى تەك ءساندى دە ساۋلەتتى ۇيلەرمەن, جاسىل جەلەكتى ساياباقتارمەن ولشەنبەيدى. كۇن سايىن كوركەيىپ كەلە جاتقان شىمكەنتتىڭ اجارى ونىڭ تازالىعىنا دا بايلانىستى. سوندىقتان ءاربىر قالا تۇرعىنى ۇلەس قوسۋى قاجەت. بىرگە تازالىق مادەنيەتىن قالىپتاستىرايىق!», دەپ جازادى شىمكەنت قالاسى اكىمدىگىنىڭ ءباسپاسوز قىزمەتى.