ەكىباستۇزدا كىسى ولتىرگەن زەينەتكەر سوتتالدى

65 جاستاعى زەينەتكەرگە 287-باپ, ياعني «قارۋدى, وق-دارىلەردى, جارىلعىش زاتتار مەن جارىلعىش قۇرىلعىلاردى زاڭسىز ساتىپ الۋ, بەرۋ, ساتۋ, ساقتاۋ, تاسىمالداۋ نەمەسە الىپ ءجۇرۋ», سونداي-اق 99-باپ, ياعني «كىسى ءولتىرۋ» بويىنشا ايىپ تاعىلدى.

ەسكە سالا كەتەيىك, 23 اقپان كۇنى ساعات 08:00-دە ەكىباستۇزدا ساتباەۆ كوشەسىندەگى ءۇيدىڭ اۋلاسىندا بەلگىسىز بىرەۋ قارۋدان وق اتقان. جاراقات العان ەر ادام وقيعا ورنىندا قازا تاپقان.

پاۆلودار وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى زەينەتكەردىڭ قر قك 99-بابىنىڭ 1-بولىگىندە جانە 287-بابىنىڭ 3-بولىگىندە كوزدەلگەن قىلمىستىق قۇقىقبۇزۋشىلىقتار جاساعانى ءۇشىن كىنالى دەپ تانىلعانىن ايتتى.

«قىلمىستىق قۇقىقبۇزۋشىلىقتاردىڭ جيىنتىعى بويىنشا جازالاردى ءىشىنارا قوسۋ جولىمەن قىلمىستىق-اتقارۋ جۇيەسى مەكەمەسىندە ەڭ جوعارى قاۋىپسىزدىكتى وتەي وتىرىپ, 12 جىل مەرزىمگە باس بوستاندىعىنان ايىرۋ تۇرىندەگى جازا تاعايىندالسىن», دەپ حابارلادى  ءباسپاسوز قىزمەتىندە.

كەيىنىرەك سوتتالۋشى قارسىلاسىنىڭ ارقاسىنان جانە باسىنان اتقانى بەلگىلى بولدى. پروكۋرور ايىپتالۋشىنى قىلمىستىق كودەكستىڭ ەكى بابى بويىنشا 14 جىلعا باس بوستاندىعىنان ايىرۋدى سۇرادى.

جابىرلەنۋشىلەر مارقۇمنىڭ ۇلى, قىزى جانە جۇبايى ەڭ جوعارى جازا شاراسىن – 15 جىل تاعايىنداۋدى جانە ارقايسىنا 5 ميلليون تەڭگە مولشەرىندە مورالدىق زيان ءوندىرىپ الۋدى سۇرادى.

سوتتالۋشى ءوز كىناسىن ءىشىنارا مويىنداپ, كىسى ءولتىرۋ ويى بولماعانىن ءتۇسىندىردى. جابىرلەنۋشىلەردىڭ ازاماتتىق تالابى ءىشىنارا قاناعاتتاندىرىلىپ, جالپى سوماسى 7 ملن تەڭگە ءوندىرىلدى.

ۇكىم ءالى زاڭدى كۇشىنە ەنگەن جوق.