تاراز قالاسىندا, قىزمەتتىك بورىشىن اتقارۋ كەزىندە قازا تاپقان اسكەري پروكۋرور, ادىلەت پولكوۆنيگى ارمان قۋانىش ۇلى قاپەزوۆتى ەسكە الۋ ماقساتىندا وڭتۇستىك ءوڭىردىڭ اسكەري پروكۋراتۋراسى عيماراتىنىڭ قاسبەتىنە ورناتىلعان مەموريالدىق تاقتانىڭ اشىلۋى ءوتتى, دەپ حابارلايدى Egemen.kz.
ءراسىمدى باس اسكەري پروكۋرور ادىلەت گەنەرال-لەيتەنانتى داستان سارتاەۆ پەن ارمان قۋانىش ۇلىنىڭ اناسى ءدىلدا قاپەزوۆا اشتى.
ارمان قاپەزوۆتىڭ ەرلىك ءىس-ارەكەتى ەشقاشان ۇمىتىلمايدى جانە جاس ۇرپاق ونى ءاردايىم ەستە ۇستاۋى كەرەك.
«ارمان قۋانىش ۇلى ادامداردى توپتاستىرا بىلەتىن جانە ارىپتەستەر اراسىندا قۇرمەت پەن بەدەلگە يە بولاتىن. ول ءوزىنىڭ مىقتى ىشكى مادەنيەتىمەن, ەرەكشە اقىلىمەن جانە جوعارى ادامگەرشىلىك قاسيەتتەرىمەن ەرەكشەلەنەتىن. ارماننىڭ جارقىن بەينەسى ءبىزدىڭ جۇرەگىمىزدە ماڭگى قالادى», دەدى داستان سارتاەۆ.
ەستەرىڭىزگە سالا كەتەيىك, اعىمداعى جىلعى 26 تامىزدا جامبىل وبلىسى بايزاق اۋدانىنىڭ №28349 اسكەري بولىمىندە وق-دارىلەردىڭ جارىلۋىنان وڭتۇستىك ايماعىنىڭ اسكەري پروكۋرورى قازا تاپقان بولاتىن. ونىڭ ارتىندا ءتورت بالاسى قالدى.
ەرلىگى مەن جانقيارلىعى ءۇشىن ارمان قاپەزوۆ مەملەكەت باسشىسىنىڭ جارلىعىمەن ءى-دارەجەلى «ايبىن» وردەنىمەن ماراپاتتالدى (قايتىس بولعاننان كەيىن).
جامبىل وبلىسىنىڭ اسكەري بولىمىندەگى قويمالاردىڭ بىرىندە جارىلىس سالدارىنان جالپى سانى 17 ادام قازا تاۋىپ, 100 شاقتى ادام جاراقات الدى.
قازا تاپقانداردىڭ اراسىندا ءورت سوندىرۋشىلەر, توتەنشە جاعداي مينيسترلىگىنىڭ, اسكەري ءبولىمنىڭ, اسكەري كۇزەت پەن اسكەري پروكۋراتۋرانىڭ قىزمەتكەرلەرى بار.