16 قىركۇيەكتە قوستانايدا جەر ءۇيدىڭ جەرتولەسىندە جارىلىس بولدى. كۋاگەرلەردىڭ ايتۋىنشا, وندا ءۇش ەر ادام مونتاجداۋ كوبىگىمەن جۇمىس ىستەپ جاتقان, دەپ حابارلايدى Egemen.kz.
«بۇل ۇيدە ءۇش ەر ادام مونتاجداۋ كوبىگىمەن جۇمىس ىستەپ جۇرگەن, قابىرعانى تىعىزداپ جاتتى. بولمەدە گاز جينالىپ قالدى. ەر ادامداردىڭ ءبىرى تۇتانعان تەمەكىمەن جەرتولەگە ءتۇستى. سالدارىنان جارىلىس بولدى. ءبارىنىڭ دەنەسى قاتتى كۇيدى, اۋىر حالدە جاتىر», دەدى وقيعا كۋاگەرلەرى.
زارداپ شەككەن ءۇش ادام دا قوستاناي قالالىق اۋرۋحاناسىنا جەتكىزىلگەن.
«1995 جىلعى ەر ادامنىڭ باسىن, كەۋدەسى مەن اياق-قولىن ءۇشىنشى دارەجەلى كۇيىك شالدى, تەرىسىنىڭ 80%-ى كۇيدى. 1984 جىلعى ەر ادامنىڭ تەرىسىنىڭ 35%-ى كۇيدى, باسى, كەۋدە تۇسى مەن تىنىس جولدارىن ءۇشىنشى دارەجەلى كۇيىك شالدى. ەكەۋى دە جانساقتاۋ بولىمىندە جاتىر», دەپ ناقتىلادى وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى كسەنيا جىلقىباەۆا.
ال 1983 جىلعى ءۇشىنشى ازاماتتىڭ بەتى مەن باسىنىڭ ءبىر بولىگىن ەكىنشى دارەجەلى كۇيىك شالعان, بارلىعى 12%. ول اۋرۋحاناعا جاتۋدان باس تارتتى.