بيىل ەۋرازيا دالاسىن قانعا بوياعان ۇلى وتان سوعىسىنىڭ باستالعانىنا 80 جىل تولىپ وتىر. فاشيستىك گەرمانيا شابۋىل جاساعاندا ەشكىم بۇل سوعىس باقانداي ءتورت جىلعا سوزىلىپ, كەڭەس وداعىنىڭ قاراماعىندا ءومىر ءسۇرىپ جاتقان 26 ميلليون ادامنىڭ ءومىرىن قيادى دەپ ويلامادى. مايدان دالاسىنا قازاقستاننان 1 ميلليون 366 مىڭ ادام اتتانىپ, ولاردىڭ 602 مىڭى ەلگە ورالماعان.
قانقۇيلى قىرعىندا قازا تاپقان سوعىس قۇرباندارىنا تاعزىم رەتىندە الماتى قالاسىندا ءبىر توپ جاستار ورتالىق زيراتتا تازالىق جۇمىستارىن جۇرگىزدى. بەيرەسمي دەرەكتەرگە قاراعاندا مۇندا 500-دەي سوعىس ارداگەرى جەرلەنگەن. «ماڭگىلىك قازاقستان» قوعامدىق قورى قىزمەتكەرلەرى مەن «ەرىكتىلەر ليگاسى» توبىنان قۇرالعان جاستار بەيىتتەردىڭ اينالاسىن قوقىستان تازالاپ, ءشوبىن وردى.
جوبا جەتەكشىسى, پولكوۆنيك, ارداگەر مۇحامەدجان ابدىبەكوۆتىڭ ايتۋىنشا باتىرلاردىڭ ەرلىگى جادىمىزدا ماڭگى ساقتالۋى ءتيىس. «بۇل اكتسيانىڭ اتى «ەشكىم دە, ەشتەڭە دە ۇمىتىلمايدى» دەپ اتالادى. ءبىز وسى كۇنى ەكىنشى دۇنيەجۇزىلىك سوعىسقا ساق زامانىندا, قوبىلاندىنىڭ زامانىندا بولعان وقيعا سياقتى قارايتىن بولدىق. الايدا بۇل سۇراپىل مايدان كەشە عانا بولعان. تاريح ءۇشىن قاس-قاعىم ءسات. قانى ءالى كەۋىپ ۇلگەرگەن جوق» دەيدى ول.
اكتسياعا قاتىسىپ جۇرگەن جاستاردىڭ ءبىرى ابزال. ول قالاداعى كوللەدجدەردىڭ بىرىندە وقيدى. ارداگەرلەردىڭ قادىر-قاسيەتىن ارداقتاۋ ءۇشىن ول دا بۇگىن دوستارىمەن بىرگە تازالىق جۇمىستارىن جۇرگىزۋگە كەلدى. «بيىل 3-كۋرسقا ءوتتىم. جىلدا وسىندا كەلىپ تازالىق اكتسياسىنا قاتىسىپ تۇرامىن. ءوزىمنىڭ اتام بەلارۋس مايدانىندا كوز جۇمعان. بەيىتى سوندا. مۇندا جاتقان كىسىلەر دە اتام سياقتى سوعىس كورگەن كىسىلەر عوي» دەپ ءوز ويىن ورتاعا سالدى ابزال.
ايتا كەتەيىك, بۇل اكتسيا الماتى قالاسى قوعامدىق دامۋ باسقارماسىنىڭ «ازاماتتىق بورىش» جوباسى اياسىندا ىسكە اسىرىلدى.
الماتى