شىعىس قازاقستان وبلىسىندا جىل باسىنان بەرى قوس ازاماتتىقپەن جۇرگەن 60-تان استام ادام انىقتالدى, دەپ حابارلايدى Egemen.kz.
بيىل تامىز ايىندا 2003 جىلى التاي ولكەسىندە رەسەي فەدەراتسياسىنىڭ ازاماتتىعىن العان وسكەمەن قالاسىنىڭ تۇرعىنى انىقتالدى. ول قازاقستان رەسپۋبليكاسىنا كىرگەن كەزدە قر ازاماتىنىڭ جەكە باسىن كۋالاندىراتىن قۇجاتتى پايدالانىپ جۇرگەن.
قوس ازاماتتىعى بارلاردىڭ باسىم كوپشىلىگى قر ازاماتىنىڭ قۇجاتتارىن تاپسىرۋ قاجەتتىلىگىن بىلمەگەندىكتەن قالدىرعانىن ايتادى. دەسە دە, مۇنداي قادامعا قاساقانا بارعاندار دا بار. ماسەلەن, ءتارتىپ ساقشىلارى 17 جىل بۇرىن نوۆوسيبيرسك قالاسىندا رەسەي فەدەراتسياسىنىڭ ازاماتتىعىن العان سەمەي قالاسىنىڭ تۇرعىنىن انىقتادى. الايدا وسى جىلدار بويى سەمەيدە تۇرىپ, قازاقستان رەسپۋبليكاسى ازاماتىنىڭ قۇجاتتارىن پايدالانا وتىرىپ, ءبىزدىڭ ەلدە دە, رەسەيدە دە زەينەتاقى الىپ كەلگەن.
قۇقىق بۇزعانداردىڭ بارلىعىنا 100 اەك مولشەرىندە ايىپپۇل سالىندى.
«شەتەلدىكتەردەن قر ازاماتىنىڭ جەكە كۋالىگى مەن پاسپورتى الىنىپ, قازاقستان رەسپۋبليكاسىنىڭ ازاماتتىعىنان ايىرىلدى, دەدى شقو كوشى-قون قىزمەتى باسقارماسىنىڭ باستىعى ەربول بەكپاەۆ.