بازالىق مولشەرلەمە باسپانا نارىعىنا قالاي اسەر ەتەدى؟

ەكونوميست ەلدار ءشام­سۋت­دينوۆتىڭ ايتۋىنشا, بازالىق ستاۆكانى ەسكەرە وتىرىپ ۇلتتىق بانك نارىقتان اقشا جيناي باستايدى.

«بازالىق ستاۆكانىڭ كوتە­رىلۋى كوممەرتسيالىق بانك ستاۆ­كالارىنىڭ دا كوتەرىلۋىنە الىپ كەلەدى. سونىمەن بىرگە اقشا-نەسيە ساياساتىنىڭ قاتاڭداۋىنا باي­لانىستى مەملەكەت باستى جەتكىزۋشى رەتىندە قۇرىلىستىڭ الدىڭعى شەبىنە شىعادى. ەكىنشى دەڭگەيلى بانكتەر ناقتى سەكتوردى قارجىلاندىرۋدى توقتاتادى. ولارعا ودان دا ۇلتتىق بانككە قۇندى قاعازدار سالعان ىڭعايلى. بۇل جالپى العاندا ەندى باس­تالىپ جاتقان كوممەرتسيالىق قۇرىلىستاردىڭ باياۋلاۋىنا اكەلىپ سوعۋى مۇمكىن. قازىر ءبىز بايقاپ وتىرعان كارانتيننەن كەيىنگى قۇرىلىس قارقىنى جاقىن ارادا قايتادان السىرەيدى. ويت­كەنى كوپتەگەن كومپانيالار پاتەرلەرىن ساتتى, بىراق قۇرى­لىستى اياقتامادى, سەبەبى قارجى­لارىن باسقا قۇرىلىستارعا جۇم­ساپ قويدى. مەنىڭشە, قاراشاعا قاراي كەيبىر كومپانيالار مىن­دەتتەمەلەرىن ورىنداي الماي قالۋى ىقتيمال», دەيدى ساراپشى.

وتكەن ايدا تۇرعىن ءۇي ساتىپ الۋ-ساتۋ كەلىسىمشارتىن جاساۋ كورسەتكىشى دە تومەندەپ كەتكەن. تامىزدا جالپى سانى 46 457 كەلىسىم جاسالعان, بۇل شىلدەمەن سالىستىرعاندا 0,4 پايىزعا تومەن. 46 مىڭنان استام كەلىسىمنىڭ 32 مىڭى كوپقاباتتى ءۇي پاتەرلەرى بويىنشا جاسالسا, 14 مىڭعا جۋىعى جەكە ۇيلەرگە قاتىستى.

سونداي-اق ۇلتتىق ستاتيستيكا بيۋروسى جازدىڭ سوڭعى ايىن­دا ءبىرىنشى نارىق ۇيلەرىنىڭ 1,1 پايىزعا قىمباتتاعانىن جاريا­لادى. قازىر قازاقستاندا پاتەر شارشى مەترىنىڭ ورتاشا باعاسى – 343 815 تەڭگە. ەڭ قىمبات شارشى مەتر – 436 مىڭ تەڭگە – نۇر-سۇلتان قالاسىندا, بۇل كورسەتكىش الماتىدا 409 مىڭ تەڭگە بولسا, شىمكەنتتە 357 مىڭ تەڭگە شاماسىندا. ال ەڭ ارزان وڭىرلەر – تاراز (149 مىڭ) بەن قىزىلوردا (165 مىڭ) جانە سەمەي (209 مىڭ) قالالارى.

قازاقستان قۇرىلىسشىلار وداعىنىڭ توراعاسى تالعات ەرعاليەۆتىڭ ايتۋىنشا, ەلدەگى باسپانا باعاسى كەلەر كوكتەمنەن باستاپ كۇرت وسەدى.

«جىل سوڭىنا دەيىن ءبىرىنشى نارىقتا باعا بويىنشا ايتارلىقتاي وزگەرىس بولمايدى. ال جىل سوڭى ساتىلىم بويىنشا ءار كەز بەلسەندى ءوربيدى, سوعان سايكەس باعا دا وسەدى. بىراق قاتتى ەمەس. ءارى كەتسە 5 پايىزعا دەيىن قىمباتتار. مەنىڭ ويىمشا, باعانىڭ تىم قىمباتتاۋى كەلەر جىلدىڭ كوكتەمىندە بايقالادى. ول كەزدە تۇرعىن ءۇي قۇنى 10-15 پايىزعا دەيىن شارىقتاۋى مۇمكىن. باعا وسىمىنە اسەر ەتەتىن بىرنەشە فاكتور بار, ونىڭ ىشىندە دوللار كۋرسىن, قۇرىلىستاعى ۇلەسى 60 پايىزعا دەيىن جەتەتىن يمپورتتىق تاۋارلار باعاسىن ايتا الامىز», دەيدى ت.ەرعاليەۆ.

ەسكە سالساق, وسىدان اپتا بۇرىن باسەكەلەستىكتى قورعاۋ جانە دامىتۋ اگەنتتىگىنىڭ باسشىسى سەرىك جۇمانعارين قۇرىلىس ماتەريالدارىنىڭ باعاسىنا تۇسىنىكتەمە بەرگەن.

«جىل باسىنان بەرى وتاندىق قۇرىلىس ماتەريالدارى باعاسىنىڭ ءوسۋى 25 پايىزدى قۇرادى. بۇل رەتتە سىرتقى نارىقتاعى جاعدايلار باعا وسىمىنە اسەر ەتۋدە. اتالعان وزگەرىستەر ارماتۋرا (+45 پايىز), كابەل (+20 پايىز), پروفليست (+70 پايىز), شىنى (+35 پايىز) تاۋارلارىنا اسەر ەتتى. قازىرگى كەزدە ءبىرىنشى نارىقتاعى ۇيلەر باعاسىنىڭ ارزانداۋى بايقالىپ وتىر. شامامەن 3 پايىزدان 0,4 پايىزعا دەيىن ارزاندادى. ەكىنشى نارىق پاتەرلەرى 5 پايىزدان 1,1 پايىزعا تومەندەدى», دەگەن ەدى ۇكىمەت وتىرىسىندا.

تەلەگرامداعى Tengenomika كانالى بازالىق ستاۆكانىڭ ءوسۋىن اقىلعا سىيىمدى شەشىم دەپ باعالايدى. «بۇل ءبىزدىڭ نارىقتىق كۇتۋلەرىمىزگە سايكەس كەلەدى جانە قالىپتى ءارى ءوز ۋاقىتىندا قابىلدانعان شەشىم. ەندى ءارى قاراي نە بولارى بەلگىسىز. ۇلتتىق بانك تاعى دا ستاۆكانى كوتەرە مە, الدە ءۇزىلىس جاساي ما؟ ءبىزدىڭ كوزقاراس بويىنشا, شەشىمنىڭ قالاي بولارى ەل ىشىندەگى ينفلياتسيا دەڭگەيىنە, فەدەرالدى رەزەرۆ جۇيەسىنىڭ جاقىن اراداعى ارەكەتىنە, سونداي-اق نارىق رەاكتسياسىنا تىكەلەي بايلانىستى» دەپ جازادى كانال ساراپشىلارى.