وقۋ جىلىنىڭ باسىنان قر ءبىلىم جانە عىلىم سالاسىندا ساپانى قامتاماسىز ەتۋ كوميتەتىنە ازاماتتاردان 70-كە جۋىق ءوتىنىش تۇسكەن, دەپ جازادى Egemen.kz.
ءبىلىم بەرۋ سالاسىندا ساپانى قامتاماسىز ەتۋ دەپارتامەنتتەرىنىڭ قىزمەتكەرلەرى وتىنىشتە ايتىلعان جاعدايلارعا ءتيىستى شارا قابىلدادى.
ماسەلەن, تۇركىستان وبلىسى سارىاعاش اۋدانى ب. وماروۆ اتىنداعى №50 مەكتەپ مۇعالىمدەرى مەكتەپ ديرەكتورىنىڭ مىندەتىن اتقارۋشى ولاردى كۋرورتتىق ايماقتا گولف الاڭىن تازالاۋ جۇمىسىنا تارتقانى ءۇشىن شاعىمداندى. ماسەلەنىڭ ءمان-جايى انىقتالعاننان كەيىن لاۋازىمدى تۇلعا قىزمەتىنەن بوساتىلدى.
تۇركىستان وبلىسىندا بالاباقشا تاربيەشىسى قىزمەتىنەن زاڭسىز بوساتىلعان, الايدا اكىمدىكتىڭ ءبىلىم باسقارماسى ونىڭ قۇقىعىن قالپىنا كەلتىرۋ بويىنشا شارالار قابىلداماعان. ءبىلىم سالاسىندا ساپانى قامتاماسىز ەتۋ جونىندەگى اۋماقتىق دەپارتامەنتى قىزمەتكەرلەرىنىڭ ارالاسۋىنان كەيىن عانا تاربيەشى بۇرىنعى جۇمىسىنا قايتىپ ورالدى.
اتىراۋ وبلىسىندا پەداگوگيكالىق ەتيكا ەرەجەلەرىن بۇزعانى ءۇشىن ق. احمەدياروۆ اتىنداعى ورتا مەكتەپتىڭ مۇعالىمى جۇمىسىنان بوساتىلدى.
الماتى وبلىسىندا دەپارتامەنت قىزمەتكەرلەرى مۇعالىمنىڭ وتىنىشىنەن كەيىن شارالار قابىلدادى. وتىنىشتە مۇعالىم ءبىلىم بەرۋ ۇيىمدارىندا اقشا جيناۋ جانە ولارعا ءتان ەمەس فۋنكتسيالارعا تارتۋ فاكتىلەرى تۋرالى حابارلاعان. ماسەلە قارالعاننان كەيىن تەكەلى قالاسىنداعى №6 ورتا مەكتەبىنىڭ ديرەكتورىن قىزمەتىنەن بوساتۋ تۋرالى شەشىم قابىلدانىپ, وسىعان ۇقساس فاكتىلەر راستالدى. سونىمەن قاتار تەكەلى قالاسى اكىمدىگىنىڭ ءبىلىم ءبولىمى باسشىسىنىڭ م.ا. تارتىپتىك جاۋاپكەرشىلىككە تارتۋ ۇسىنىلدى.
پەداگوگتەردىڭ قۇقىقتارى مەن زاڭدى مۇددەلەرىنىڭ ەڭ كوپ بۇزىلۋى تۇركىستان جانە الماتى وبلىستارىندا بايقالادى.
سونىمەن قاتار الەۋمەتتىك جەلىلەردە يممۋنيزاتسيالاۋ شارالارى بويىنشا ءتىزىم جاساۋ تۋرالى قۇجات جاريالاندى. مۇنداي اقپاراتتى جيناۋ جونىندەگى بۇيرىق قر بعم-مەن قاراستىرىلماعان. اۋداندىق ءبىلىم ءبولىمىنىڭ باسشىسى تارتىپتىك جاۋاپكەرشىلىككە تارتىلدى.
«ايتا كەتەيىك, قر ءبىلىم جانە عىلىم ءمينيسترىنىڭ تاپسىرماسى بويىنشا ءار وبلىستا پەداگوگيكالىق ادەپ جونىندەگى كوميسسيالار قۇرىلدى, ولار پەداگوگتەردىڭ قۇقىقتارىن بۇزۋ بويىنشا وتىنىشتەر مەن فاكتىلەردى جەدەل قارايدى», دەپ جازادى قر بعم ءباسپاسوز قىزمەتى.