7 قىركۇيەكتە ماحامبەت اۋدانى, تاڭداي اۋىلى تۇرعىندارى نارازىلىق تانىتىپ, بيولوگيا ءپانى مۇعالىمىنىڭ جۇمىسقا شىعۋىنا قارسىلىق ءبىلدىردى. بۇل ماسەلەگە وبلىستىق ءبىلىم بەرۋ باسقارماسى دا نازار اۋداردى, دەپ حابارلايدى Egemen.kz.
ەسكە سالا كەتسەك, تاڭدايلىقتار جارتى جىل بويى ناعاشىسىنىڭ مۇردەسىن قورادا ساقتاعان مۇعالىمنىڭ جەرگىلىكتى مەكتەپكە قايتا جۇمىسقا شىعۋىنا بەي-جاي قاراي المادى.
«اتا-انالاردىڭ ءوتىنىشى ەسكەرىلدى. بۇل جاعداي مەكتەپتىڭ پەداگوگيكالىق كەڭەسىندە جان-جاقتى تالقىلانىپ, ەڭبەك كودەكسىنىڭ تالاپتارىنا سايكەس ول مۇعالىم جۇمىسىنان بوساتىلدى», دەپ حابارلادى وبلىستىق ءبىلىم بەرۋ باسقارماسىنىڭ باستىعى ساتقان ەسەنعاليەۆ.
الاقانداي اۋىلدى ءدۇر سىلكىندىرىپ, ۇرەي تۋعىزعان بۇل جايت وتكەن جىلى بولعان. 82 جاستاعى ناعاشىسىنىڭ مۇردەسى قاڭتاردا تابىلدى. ناعاشىسى ولگەننەن كەيىن ونى جەرلەۋدىڭ ورنىنا مۇردەسىن ۇزاق ۋاقىت اۋلاداعى قورادا ساقتاپ, تۋىسقاندارعا قىزىلورداعا, نە باسقا جاققا كەتىپ قالدى دەگەن ەكەن. تەرگەۋ باستالعان كەزدە ول ۋاقىتشا جۇمىسىنان شەتتەتىلدى, بىراق كەيىن پوليتسيا ونىڭ ارەكەتىنەن قىلمىستىق قۇرام انىقتاعان جوق. جازدا ول اۋىلدان كەتەدى دەگەندى ەستىگەن حالىق بەيقام وتىردى. ەندى جاڭا وقۋ جىلى باستالعاندا ول مەكتەپكە جۇمىسقا قايتا شىعىپتى. وسى جاعداي اۋىل تۇرعىندارىنىڭ نارازىلىعىن تۋدىرعان.