The New York Times گازەتى تاياۋدا اقش اۋە كۇشتەرى كابۋلدا دروننان جاساعان اۋە شابۋىلىنان بىردە-ءبىر تەرروريست قازا تاپپاعانىن حابارلادى. باسىلىم كەلتىرگەن دەرەكتەرگە سۇيەنسەك, 43 جاستاعى زەماري احمادي ەسىمدى قاراپايىم تۇرعىن وتباسىنىڭ توعىز مۇشەسىمەن قازا تاپقان. قايتىس بولعانداردىڭ جەتەۋى بالا ەكەن.
اقش اسكەريلەرى 29 تامىزدا جاساعان وپەراتسياسىنىڭ ماقساتى – «دايش»-تان (قازاقستاندا تىيىم سالىنعان تەرروريستىك ۇيىم) كەك الۋ ەدى. بۇعان دەيىن اتالعان تەرروريستىك توپ كابۋل اۋەجايىنا شابۋىل جاساپ, جۇزدەگەن ادامنىڭ ءومىرىن قيعان-دى. ولاردىڭ قاتارىندا 13 اقش ساربازى دا بار.
اقش شتابى توراعاسى, گەنەرال مارك ءميلليدىڭ ايتۋىنشا, اۋە سوققىسى «دايش» ساربازدارى مىنگەن كولىككە جاسالعان. ايتسە دە, The New York Times گازەتىنىڭ تىلشىلەرى بۇعان كۇمان كەلتىرەدى.
باسىلىم جۋرناليستەرى تۇسىرىلگەن ۆيدەولارعا تالداۋ جاساپ, ءاحماديدىڭ ارىپتەستەرىمەن جانە وتباسىمەن سۇحباتتاسىپ, وقيعا ورنىنا بارعاننان كەيىن رەسمي نۇسقانىڭ راستىعىنان كۇدىكتەنەدى.
زەماري احمادي «تاماقتانۋ جانە ءبىلىم بەرۋ» حالىقارالىق ۇيىمىنىڭ قىزمەتكەرى بولعان. ول سول كۇنى ارىپتەستەرىن ۇيلەرىنە جەتكىزىپ تاستاپ, كولىگىنە سۋ قۇيىلعان بوشكە تيەپ, ءوز ۇيىنە بارا جاتقان. اقش بارلاۋشىلارى سول بوشكەلەردى جارىلعىش زاتقا ساناعانعا ۇقسايدى.
باسىلىمنىڭ حابارلاۋىنشا, باقيعا اتتانعان 10 مارقۇمنىڭ 7-ەۋى بالا بولعان. سولاردىڭ ىشىندە 5-ەۋى 7-گە دە تولماعان ەكەن. وسىعان بايلانىستى The New York Times اقش ورتالىق باسقارماسىنا سۇراۋ سالعان. الايدا بيلىك تاراپىنان ەشقانداي جاۋاپ بولماعان.
بۇعان دەيىن اقش اسكەريلەرى بىرنەشە رەت قاتەلەسىپ اۋە شابۋىلىن جاساعان ەدى. 2008 جىلى وسىنداي ءىس-قيمىل كەزىندە ۇيلەنۋ تويىن تويلاپ جاتقان 47 ادام مەرت بولدى.