پرەزيدەنت تەلەراديوكەشەنى «ابايدىڭ قاراسوزدەرى» كينوجوباسىنىڭ ءتۇسىرىلىم جۇمىستارىن باستادى. 15 بولىمنەن تۇراتىن تۋىندى «ۇلتتىق كينونى قولداۋ مەملەكەتتىك ورتالىعىنىڭ» قولداۋىمەن جۇزەگە اسىپ وتىر. ءتۇسىرىلىم جۇمىستارى الماتى قالاسى مەن الماتى وبلىسىنىڭ اۋماعىندا 25 قازانعا دەيىن جالعاسادى.
تەلەۆيزيالىق جوبانىڭ ءار سەرياسى تولىققاندى سيۋجەتكە قۇرىلادى. سيۋجەتتەردە باس كەيىپكەردىڭ ءرولىن تۇڭعىشباي جامانقۇلوۆ, نۇرلان ءالىمجانوۆ, جان بايجانباەۆ, ەرىك جولجاقسىنوۆ, ارۋجان جازىلبەكوۆا, بەرىك ايتجانوۆ, ايان وتەپبەرگەن, ت.ب. تانىمال قازاقستاندىق اكتەرلەر سومدايدى. جوبا اۆتورلارى كۇردەلى رەجيسسەرلىك شەشىمدەر ارقىلى ويشىلدىڭ قاراسوزدەرىن جاڭا قىرىنان اشۋعا تىرىسپاق.
تەلەراديوكەشەننىڭ باس ديرەكتورى راۋشان قاجىباەۆانىڭ ايتۋىنا قاراعاندا, ۇجىم بۇل جوباعا ۇلكەن جاۋاپكەرشىلىكپەن كىرىسىپ وتىر. «ونىڭ فيلوسوفيالىق پايىمدارى مەن دانالىعى ۋاقىت وتكەن سايىن وزەكتى بولا تۇسكەن. اقىننىڭ «قاراسوزدەرى» قوعامنىڭ رۋحاني-مادەني ومىرىنە باعدار بەرىپ تۇر. «اقىرى ويلادىم: ويىما كەلگەن نارسەلەردى قاعازعا جازا بەرەيىن, اق قاعاز بەن قارا سيانى ەرمەك قىلايىن, كىمدە-كىم ىشىنەن كەرەكتى ءسوز تاپسا, جازىپ السىن, يا وقىسىن, كەرەگى جوق دەسە, ءوز ءسوزىم وزىمدىكى دەدىم دە, اقىرى وسىعان بايلادىم, ەندى مۇنان باسقا ەشبىر جۇمىسىم جوق». حاكىمنىڭ سول ايتقانى اينىماي كەلىپ, بۇگىن جۇرت «قاراسوزبەن» جازىلعان رۋحاني مۇرانى ءالى ازىق ەتىپ كەلەدى», دەيدى راۋشان قاجىباەۆا.