قىزىلوردا وبلىسى ارال اۋدانىنداعى «ارالتۇز» اكتسيونەرلىك قوعامى جۇمىسشىلارىنىڭ جالاقى كوتەرۋ جونىندەگى ۇسىنىسى قولداۋ تاپتى, دەپ حابارلايدى Egemen.kz.
«ارالتۇز» اق باسشىلىعى وندىرىستىك قىزمەتكەرلەر جالاقىسىن 22,5 پايىزعا كوتەرۋ تۋرالى شەشىم قابىلدادى. قازىرگى تاڭدا كومپانيا جۇمىسى تولىق جانداندى.
قىركۇيەك ايىنىڭ العاشقى كۇنىندە اكتسيونەرلىك قوعام جۇمىسشىلارى جالاقىنى 50-100% كوتەرۋ جونىندە ۇسىنىس ءبىلدىردى. 2014 جىلدان باستاپ قىزمەتكەرلەر جالاقىسى 6 ەسە وسكەن. سونداي-اق, 2021 جىلدىڭ 1 ناۋرىزىندا جالاقىنى 10%-عا ارتتىرۋ تۋرالى شەشىم قابىلدادى.
كاسىپورىن مىندەتتى الەۋمەتتىك مەديتسينالىق ساقتاندىرۋعا جارنالاردى وتەۋ تۋرالى مىندەتتەمەنى وزىنە الدى. كومپانيا پاندەميا كەزىندە جۇمىس ورىندارىن قىسقارتقان جوق. وعان قوسا قىزمەتكەرلەردى اقىسىز دەمالىسقا جىبەرمەگەن ساناۋلى كومپانيانىڭ ءبىرى.
«كومپانيا باسشىلىعى كاسىپوداق پەن قىزمەتكەرلەر ءوتىنىشىن قاراستىردى. سونداي-اق كۇردەلى جالپى ەكونوميكالىق جاعدايدى ەسكەرە وتىرىپ, 1 قىركۇيەكتەن باستاپ وندىرىستىك قىزمەتكەرلەردىڭ جالاقىسىن تاعى 22,5%-عا ارتتىرۋ تۋرالى شەشىم قابىلدادى. سونىمەن قاتار, جىل قورىتىندىسى بويىنشا ءوندىرىس جوسپارىن ورىنداعانى ءۇشىن ۇجىمنىڭ جۇمىسىن قولداۋ جانە ىنتالاندىرۋ شاراسى رەتىندە ءاربىر قىزمەتكەرگە قوسىمشا سىياقى بەلگىلەۋ تاپسىرىلدى. بۇگىن كومپانيانىڭ بۇكىل قىزمەتكەرلەرى ءوز مىندەتتەرىن ورىنداۋعا كىرىستى. كاسىپورىننىڭ جۇمىسى تولىق قالپىنا كەلتىرىلدى», دەپ ءمالىم ەتتى «ارالتۇز» اكتسيونەرلىك قوعامىنان.