ەلىمىزدە ستۋدەنتتىك جاتاقحانالاردى تەكسەرۋ باستالدى. رەيدتى «Jas Otan» جاستار قاناتىنىڭ جانە «Nur Otan» پارتياسى جانىنداعى جاستاردى قولداۋ جونىندەگى رەسپۋبليكالىق قوعامدىق كەڭەستىڭ وكىلدەرى ۇيىمداستىردى, دەپ حابارلايدى Egemen.kz.
«Jas Otan» جاستار قاناتىنىڭ توراعاسى نۇرجان جەتپىسباەۆ, قر پارلامەنتى ءماجىلىسىنىڭ دەپۋتاتى ەلنۇر بەيسەنباەۆ جانە جاستاردى قولداۋ جونىندەگى وڭىرلىك قوعامدىق كەڭەستىڭ وكىلدەرى قاراعاندى وبلىسىنىڭ جوعارى وقۋ ورىندارى مەن كوللەدجدەرىنىڭ جاتاقحانالارىنا مونيتورينگ جۇرگىزۋدى باستادى.
مونيتورينگتىك توپ مۇشەلەرى بولاشاق دارىگەرلەرگە ارنالعان 400 توسەك-ورىندىق ستۋدەنتتىك ءۇي سالىنىپ جاتقان «قاراعاندى مەديتسينا ۋنيۆەرسيتەتى» كەاق جاتاقحاناسىنىڭ قۇرىلىس الاڭىنا باردى. سونىمەن قاتار, قاراعاندى تەحنيكالىق ۋنيۆەرسيتەتى مەن قاراعاندى يندۋستريالىق ۋنيۆەرسيتەتىنىڭ جاتاقحانالارى قارالدى.
پارتيا مۇشەلەرى جاتاقحانالاردىڭ سۋمەن جابدىقتاۋ, جىلۋمەن جابدىقتاۋ, جارىقتاندىرۋ, سانيتارلىق نورمالارعا, ءۇي-جايلاردى كۇتىپ ۇستاۋ جانە وندا تۇرۋ جاعدايلارىنا سايكەستىگىن تەكسەردى. مونيتورينگ قورىتىندىسى بويىنشا كوپسالالى گۋمانيتارلىق تەحنيكالىق كوللەدجىنىڭ جاتاقحاناسىندا بىرقاتار بۇزۋشىلىقتار انىقتالدى.
ء«بىز ستۋدەنتتەرگە ولاردىڭ جايلى وقۋى ءۇشىن بارلىق جاعداي جاسالۋى ءتيىس دەگەن ماسەلەنى كوتەرەمىز. بىراق, بۇل مەكەمەلەردىڭ باسشىلارى بۇعان قىزىعۋشىلىق تانىتپايدى جانە اقشانىڭ جەتىسپەيتىندىگىن ايتادى. مۇندا قاراپايىم سانيتارلىق نورمالار ساقتالمايتىنىن كورەمىز. ەكى ادام تۇرۋى كەرەك ءبىر بولمەدە ۇشەۋى تۇرادى. ىستىق سۋ جوق, ءورت قاۋىپسىزدىگى نولگە تەڭ. قاراعاندىنىڭ ۋاكىلەتتى ورگاندارى بارلىعىن رەتكە كەلتىرىپ, قولعا الۋى ءتيىس دەپ ەسەپتەيمىن», دەدى دەپۋتات ەلنۇر بەيسەنباەۆ.
قاراعاندىدا جاتاقحانالارعا 2000-عا جۋىق ستۋدەنت مۇقتاج. ءىشىنارا ورىن جەتىسپەۋشىلىگى ماسەلەسى شەشىلۋدە. جاقىندا 800-دەن استام جاس 6 جاڭا جانە جوندەلگەن عيماراتتا تۇرا الادى. «Jas Otan» جاستار قاناتىنىڭ جەتەكشىسى نۇرجان جەتپىسباەۆ بۇل ماسەلە ولاردىڭ جەكە باقىلاۋىندا ەكەنىن اتاپ ءوتتى.
«بۇل جۇمىستى ءبىز ءالى دە جالعاستىراتىن بولامىز. قازىر ءبىز جاتاقحانالاردا جىل سوڭىنا دەيىن جويىلۋعا ءتيىس بۇزۋشىلىقتاردى انىقتاۋ ءۇشىن تەكسەرۋدەمىز. تەكسەرۋلەردەن كەيىن ءبىز جوو باسشىلىعىنا ۇسىنىستار بەرىپ, مينيسترلىك دەڭگەيىندە جۇمىس جۇرگىزەمىز. جىل سوڭىنا قاراي قايتا مونيتورينگ جۇرگىزىلەدى. ەڭ باستى مىندەت – ستۋدەنت جاستاردىڭ الەۋمەتتىك-تۇرمىستىق, تۇرعىن ءۇي جاعدايلارىن جاقسارتۋ», دەدى ول.