تاۋەلسىزدىكتىڭ 30 جىلدىعىنا وراي توبىل قالاسىنىڭ ورتالىعىندا جاڭا اللەيا اشىلدى. قالا تۇرعىندارى ءۇشىن قولايلى دەمالىس الاڭىنىڭ قۇرىلىسى بيىل مامىر ايىندا باستالعان. سودان بەرى جەرگىلىكتى كاسىپكەرلەردىڭ قولداۋىمەن الاڭقاي اۋماعىنا جارىق تارتىلدى.
اللەيانىڭ كىرەبەرىسىنە ءمارمارتاستان تاۋەلسىزدىك تۇعىرى ورناتىلىپ, وعان ەلباسىنىڭ «حالىقتىڭ باستى قۇندىلىعى – ەل تاۋەلسىزدىگى» دەگەن ءسوزى قاشالىپ جازىلدى. ال جانىندا بيىك تۋتۇعىرعا قوندىرىلعان ايبىنى اسقاق كوك بايراق كوكپەن تالاسا جەلبىرەپ تۇر. دەمالىس ورنىنىڭ اينالاسىنا قاراعاي مەن جاسىل جەلەكتى شىرشا ارالاس اعاش كوشەتتەرى وتىرعىزىلىپ, سايا جەردە دەمالىپ اڭگىمە-دۇكەن قۇرۋعا ىڭعايلى ورىندىقتار قويىلعان.
«تاۋەلسىزدىك اللەياسىنىڭ» اشىلۋ سالتاناتىنا قالا تۇرعىندارى مەن قوستاناي اۋدانىنىڭ اكىمى جانسۇلتان تاۋكەنوۆ, وسى ءىستىڭ قاجەتىنە قارجى ءبولىپ, قولداۋ كورسەتكەن كاسىپورىن باسشىلارى قاتىستى.
«تاۋەلسىزدىكتىڭ 30 جىلدىق بەلەسىنەن وي جۇگىرتەر بولساق, وسى ۋاقىت ارالىعىندا قازاقستان رەسپۋبليكاسى تالاي بيىكتى باعىندىرىپ, الەم ەلدەرىنىڭ اراسىنان وزىنە لايىقتى ورنىن الدى. بۇگىندە ەلىمىز ساياسي-ەكونوميكالىق تۇرعىدان جۇيەلى دامىپ كەلەدى. وسىناۋ سان سالالى دامۋ ۇدەرىسىنە قوسقان ءبىزدىڭ اۋدانىمىزدىڭ دا ءوز ۇلەسى بار. وعان جايقالىپ وسكەن ەگىنىمىز, قامبا تولى استىعىمىز, وسى استىقتى وڭدەپ, سان ءتۇرلى ءونىم شىعارىپ جاتقان كاسىپورىندارىمىز, جىل سايىن جاڭارعان جولدارىمىز بەن اۋدان ورتالىعىندا بوي كوتەرىپ جاتقان ءزاۋلىم تۇرعىن ۇيلەرىمىز, بۇگىنگى بەرەكەلى تۇرمىسىمىز دالەل بولا الادى. بۇگىن سالتاناتتى تۇردە اشىلىپ وتىرعان «تاۋەلسىزدىك اللەياسى» اۋدانىمىزداعى ديقاندار مەن اۋىلشارۋاشىلىق تاۋارىن ءوندىرۋشى كاسىپورىنداردىڭ تىكەلەي قولداۋىمەن بىتكەن دۇنيە», دەدى ج.تاۋكەنوۆ.
سالتاناتتى جيىن بارىسىندا اكىم اۋداننىڭ ەكونوميكالىق دامۋىنا ۇلەس قوسىپ, ەل الەۋمەتىنىڭ جاقسارۋىنا تۇراقتى تۇردە دەمەۋشىلىك كورسەتىپ جۇرگەن ءتورت كاسىپكەرگە «جومارت جۇرەك» مۇسىنشەسىن تابىس ەتتى. ودان كەيىن مىنبەرگە ماراپات يەلەرى شىعىپ, جينالعان كوپشىلىككە وزدەرىنىڭ جىلى لەبىزدەرىن ءبىلدىردى.
– بۇگىن قالا تۇرعىندارىنىڭ يگىلىگىنە تاپسىرىلىپ جاتقان «تاۋەلسىزدىك اللەياسىنا» مەنىڭ دە قاتىسىم بار ەكەنى زور ماقتانىش ەكەنىن ايتا كەتكىم كەلەدى. جاڭا اللەيا توبىل تۇرعىندارى مەن قالا قوناقتارى ءجيى كەلەتىن جىلى ورىنعا اينالاتىنىنا سەنىمدىمىن. ءوزىم وزەرنىي اۋىلىندا تۇرامىن, بىراق توبىلعا ءجيى كەلەمىن. ەندى وتباسىمدى, بالالارىم مەن نەمەرەلەرىمدى وسى اللەياعا ەرتىپ كەلىپ, سەرۋەندەپ سەرگىپ قايتاتىن بولامىن. مەرەيتويدىڭ شىرايىن سىيلىق اشادى, ەل تاۋەلسىزدىگىنىڭ 30 جىلدىعىنا وراي ءبىز ءبىر توپ كاسىپكەر بولىپ بۇگىنگى ابات الاڭقايدى اۋدانىمىزعا مەرەيتويلىق تارتۋ رەتىندە سىيلاعاندى ءجون كوردىك, – دەدى «ك.ماركس اتىنداعى» سەرىكتەستىكتىڭ باسشىسى يۆان ۆەچتەين.
«جومارت جۇرەك» سىيلىعىنا يە بولعاندار قاتارىندا «بك-قۇرىلىسوندىرىسى» جشس ديرەكتورى سەرگەي كيم, «شەمينوۆ» جشس باسشىسى يۋري چەحوۆسكي, «نۇر توبا» سەرىكتەستىگىنىڭ ديرەكتورى ەرمەك جۇمابەكوۆ تە بار.