جامبىل وبلىسى قاراتاۋ قالاسىنداعى كوشەلەردىڭ بىرىندە وقتان جارالانعان ەر ادامنىڭ ءمايىتى تابىلدى. پوليتسيا دەپارتامەنتى مالىمەتىنشە, ەر ادام وزىنە-ءوزى قول جۇمساعان بولۋى مۇمكىن, دەپ حابارلايدى Egemen.kz.
2021 جىلى 2 قىركۇيەكتە تالاس اۋداندىق ىشكى ىستەر بولىمشەسىنىڭ كەزەكشى بولىمىنە بەلگىسىز ەر ادامنىڭ ءمايىتى تابىلعانى تۋرالى حابارلاما تۇسكەن. مايىتتە وق جاراقاتى بولعان.
«مارقۇم ءوز اتىنا تىركەلگەن اڭشى مىلتىعىنان وزىنە وق اتقانى انىقتالعان. قابىلدانعان شارالار بارىسىندا قايتىس بولعان ادامنىڭ جەكە باسى انىقتالدى جانە تۋىستارى ونى تانىعان, ول ەلدى مەكەننىڭ تۇرعىنى بولىپ شىقتى. ءوز-وزىنە قول جۇمساۋدىڭ سەبەبى مەن ءىستىڭ بارلىق ءمان-جايىن انىقتاۋ ءۇشىن تەرگەۋ ورگاندارى قر قك-ءنىڭ 105-بابى, 1-بولىگى بويىنشا سوتالدى تەرگەۋدى باستادى, ياعني وزىنە-ءوزى قول جۇمساۋعا دەيىن جەتكىزۋ», دەدى جامبىل وبلىسى پد ءباسپاسوز قىزمەتىندەگىلەر.
قازىرگى ۋاقىتتا بارلىق قاجەتتى سوت-مەديتسينالىق ساراپتامالار تاعايىندالىپ, تەرگەۋ ارەكەتتەرى جۇرگىزىلىپ جاتىر.قازاقستان رەسپۋبليكاسى قىلمىستىق ءىس جۇرگىزۋ كودەكسىنىڭ 201-بابىنا سايكەس, تەرگەۋ مۇددەسىنە قاتىستى, ءىستىڭ باسقا دا مالىمەتتەرى جاريا ەتۋگە جاتپايدى.
ءىnbusiness.kz پورتالى تالاس اۋدانى اكىمدىگىنە سىلتەمە جاساپ, قازا تاپقان ەر ادام تالاس اۋدانى اكىمدىگىنىڭ تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمىنىڭ سەكتور مەڭگەرۋشىسى ەكەنىن جازدى.