نوگينسك قالاسىنداعى تۇرعىن ۇيلەردىڭ بىرىندە گاز جارىلدى. سالدارىنان زارداپ شەككەندەردىڭ سانى سەگىز ادامعا جەتكەن. ونىڭ ىشىندە ەكى بالا بار, دەپ حابارلايدى Egemen.kz ماسكەۋ وبلىسى دەنساۋلىق ساقتاۋ مينيسترلىگىنىڭ ءباسپاسوز قىزمەتىنە سىلتەمە جاساپ.
«ولاردىڭ بارلىعى مەديتسينالىق كومەك كورسەتۋ ءۇشىن نوگينسك اۋرۋحاناسىنا جاتقىزىلدى», دەلىنگەن حابارلامادا.
جارىلىس نوگينسك قالاسىنىڭ 28 ماۋسىم كوشەسى, 9ا مەكەنجايىندا ورنالاسقان عيماراتتا بولعان. عيماراتتىڭ ەكىنشى, ءۇشىنشى جانە ءتورتىنشى قاباتى جارتىلاي وپىرىلىپ تۇسكەن. وقيعا ورنىنان 170-تەن استام ادام ەۆاكۋاتسيالاندى.
رەسەيلىك كەيبىر بۇقارالىق اقپارات قۇرالدارى جاراقات العانداردىڭ اراسىندا ءبىر ادام رەانيماتسيادا جاتقانىن جازدى.