قازاقستاندىق زيالى قاۋىم وكىلدەرى مەن كىتاپحاناشىلاردان قۇرىلعان دەلەگاتسيا وكىلدەرى «سوعىس جانە بەيبىتشىلىك» اتتى حالىقارالىق ەكسپەديتسيا جوباسى بويىنشا رەسەي مەملەكەتتىك كىتاپحاناسىندا اباي قۇنانباي ۇلى, جامبىل جاباەۆ پەن مۇقاعالي ماقاتاەۆتىڭ شىعارماشىلىعىنا ارنالعان حالىقارالىق كورمەگە قاتىسۋدا.
كورمەدە رەسەيلىك جانە قازاقستاندىق كىتاپحانالاردىڭ سيرەك كەزدەسەتىن باسىلىمدارى ۇسىنىلدى. سونداي-اق حاكىم ابايدىڭ جارىق كورگەن العاشقى كىتابى دا قويىلدى.
ەل تاۋەلسىزدىگىنىڭ 30 جىلدىعى اياسىندا ۇيىمداستىرىلعان حالىقارالىق ەكسپەديتسياعا رەسەي مەملەكەتتىك كىتاپحاناسىنىڭ ديرەكتورى ۆاديم دۋدا, قازاقستان ۇلتتىق اكادەميالىق كىتاپحاناسىنىڭ باسشىسى ءۇمىتحان مۇڭالباەۆا, رەسەي جازۋشىلار وداعىنىڭ باسقارما توراعاسى نيكولاي يۆانوۆ, رەسەيلىك قالامگەر گريگوري پرياحين, قازاقستان جازۋشىلار وداعىنىڭ مۇشەلەرى بايانعالي ءالىمجانوۆ, مەرەي قارت, الىبەك بايبول, ەۇۋ پروفەسسورى سەيداحمەت قۇتتىقادام جانە باسقا دا ەكى ەلدىڭ عىلىمي جانە شىعارماشىلىق قاۋىمى قاتىسۋدا.
باعدارلامادا اباي مەن پۋشكين ەسكەرتكىشتەرىنە گۇل شوقتارىن قويۋ جوسپارلانعان. قازاقستان تاريحىن, مادەنيەتى مەن ادەبيەتىن ناسيحاتتاۋ ماقساتىندا ءوتىپ جاتقان ءىس-شارادا ۇلى وتان سوعىسىنداعى جەڭىستىڭ 76 جىلدىعى, ماسكەۋ شايقاسىنىڭ 80 جىلدىعى جانە رجەۆ تۇبىندەگى ۇرىستاردىڭ باستالۋى اياسىندا ماسكەۋ مەن ماسكەۋ وبلىسىنداعى جاۋىنگەرلەردىڭ جەرلەنگەن جەرلەرىنە بارۋ دا كوزدەلىپ وتىر.
جوبا قاتىسۋشىلارى ۇلى وتان سوعىسى كەزىندەگى مەموريالدىق جانە مۇراجاي كەشەندەرىن ارالاپ, رجەۆ اۋدانى ترۋبينو اۋىلىنىڭ تۇرعىندارىمەن كەزدەسۋلەرگە قاتىسادى, سونداي-اق ماسكەۋ قالاسى م.ي.رۋدومينو اتىنداعى شەتەل ادەبيەتى كىتاپحاناسىندا «كىتاپحانالار – جەڭىستىڭ كۋاگەرلەرى» تاقىرىبى بويىنشا دوڭگەلەك ۇستەل وتكىزەدى. بۇل جوبا ۇلى جەڭىستىڭ 75 جىلدىعىنا ارنالعان تمد ەلدەرى مەن شانحاي ىنتىماقتاستىق ۇيىمىنىڭ ۇلتتىق كىتاپحانالارى بىرلەسە جۇزەگە اسىرىپ, جەڭىسكە ۇلەس قوسقان ادامدار تۋرالى كىتاپتاردىڭ, باسپا شىعارمالارىنىڭ جانە جازبالاردىڭ باي ماتەريالدارى جينالىپ, م.ي.رۋدومينو اتىنداعى كىتاپحانانىڭ سايتىنا ورنالاستىرىلدى.
«بالالار مەن جاسوسپىرىمدەر ادەبيەتى» جىلىنىڭ باعدارلاماسى اياسىندا بالالار اۆتورلارىمەن جانە يلليۋستراتورلارمەن كەزدەسۋلەر مەن رەسەي مەملەكەتتىك بالالار كىتاپحاناسىندا دوڭگەلەك ۇستەل وتكىزۋ دە ۇيىمداستىرىلماق. قازاقستاندىق جانە رەسەيلىك زيالى قاۋىمنىڭ كەزدەسۋلەرى مەن بىرلەسكەن ءىس-شارالارى مەملەكەتارالىق بايلانىستاردى نىعايتىپ, قازاقستان مەن رەسەي اراسىنداعى بىرىڭعاي مادەني-پاتريوتتىق كەڭىستىكتى قالىپتاستىرۋدىڭ كوپىرى بولماق.
جوبانى ۇيىمداستىرۋشىلار مەن قاتىسۋشىلار قازاقستان مەن رەسەي كىتاپحانالارىنىڭ وقىرماندارىن تانىستىرۋ جانە بالالار مەن جاستارمەن باسقا دا پاتريوتتىق ءىس-شارالار وتكىزۋ ءۇشىن مالىمەتتەر بازاسى مەن ماتەريالدار جيناعىن قالىپتاستىرۋدى ماقسات ەتىپ وتىر.