اتىراۋ وبلىسىنداعى ساياباقتا بالانى توك سوعىپ, اۋىر حالدە ورتالىق وبلىستىق اۋرۋحاناعا ءتۇستى, دەپ حابارلايدى Egemen.kz.
«موي گورود» سايتىنىڭ جازۋىنشا, وقيعا 2 قىركۇيەك كۇنى كەشكى توعىزدار شاماسىندا اتىراۋ وبلىسى قۇرمانعازى اۋىلىنىڭ ورتالىق ساياباعىندا بولعان.
بالانىڭ تۋىستارى 11 جاستاعى امانجول سۇلتاننىڭ كوشەنى جارىقتاندىرۋ باعانىن ۇستاپ قالىپ, ەلەكتر توگىنا تۇسكەنىن ايتادى. جابىرلەنۋشى بىردەن اۋداندىق ورتالىق اۋرۋحانانىڭ جانساقتاۋ بولىمىنە جەتكىزىلدى. ەمدەۋ مەكەمەسىنىڭ حيرۋرگى نۇرعيسا شولپانوۆ باستاپقىدا بالانىڭ جاعدايى وتە اۋىر دەپ باعالانعانىن ايتادى.
«بالا ءۇش كۇن رەانيماتسيادا بولدى. تىنىس الۋ جانە جۇرەك جەتىسپەۋشىلىگى بولدى. رەانيماتولوگتار ۋاقىتىلى بىلىكتى كومەك كورسەتتى. قازىر ونىڭ جاعدايى ورتاشا اۋىر دەپ باعالانىپ, ءتيىستى ەم قابىلداپ جاتىر. ەلەكتر توگىنان كەيىن جۇرەك-تامىر جۇيەسى ءبىرىنشى كەزەكتە زارداپ شەگەدى. بۇگىن ول ەكىنشى ەكگ پروتسەدۋراسىنان وتەدى. ناتيجەسىن وبلىستىڭ ماماندارى زەرتتەيدى, باستاپقى كورسەتكىشتەرمەن سالىستىرادى. ەمدەۋ كۋرسى 10 كۇن, بالا جالپى پالاتادا جاتىر», دەيدى شولپانوۆ.
ورتالىق جەڭىس ساياباعى قازىر جوندەۋ جۇمىستارى ءجۇرىپ جاتقانى ءۇشىن جابىق. ول 2021 جىلى اۋىل اكىمدىگىنىڭ بالانسىنا بەرىلگەن.
بالانىڭ اتا-اناسى پوليتسياعا ارىز جازباعان.