ءا.قاستەەۆ اتىنداعى مەملەكەتتىك ونەر مۋزەيىندە كەشە رەسەيلىك جاس سۋرەتشى يۋليا ۆيركونىڭ Work in progress كورمەسى اشىلدى. اۆتور سۋرەتتەرى مەن كەسكىندەمەسى مۋزەي كوللەكتسياسىنداعى جۇمىستارمەن بىرىكتىرىلگەن جوبا ءبىر ايعا سوزىلادى. كورمەنى Grabar Gallery – ناتاليا گراباردىڭ گالەرەياسى ۇيىمداستىرىپ وتىر.
فانتاستيكالىق سيۋجەتتەرى بار اۋقىمدى كەنەپتەر – يۋليا ۆيركونىڭ نەگىزگى قولتاڭباسى. ەكسپەريمەنت رەتىندە ۇيىمداستىرىلىپ وتىرعان كورمەدە اۆتوردىڭ كارتينالارى عانا ەمەس, سونداي-اق ولاردىڭ سالىنۋ ۇدەرىسى دە كورسەتىلمەك.ەكسپوزيتسيا كىشىگىرىم لابيرينت سەكىلدى: ونىڭ سىرتقى بولىگى «ناتيجە», ال ىشكى اۋماعى «ۇدەرىس» دەپ اتالادى. ءبىرىنشى بولىمىندە ۆيركونىڭ كەسكىندەمەلىك جۇمىستارى ۇسىنىلعان. «ساناڭ شەكارانى بىلمەيدى» جوباسى توپتاما تۇستەر مەن بەيسانالىققا ارنالسا, «ۋادەلى ساعىم» توپتاماسىن قۇرايتىن جاڭا جۇمىستارى سيۋجەتتى اڭگىمەلەۋدىڭ تۇتاستىعىمەن جانە قۇندىلىعىمەن ەرەكشەلەنەدى.WORK IN PROGRESS ەكسپوزيتسياسىنىڭ ەكىنشى ءبولىمى – «ۇدەرىس» – بۇل كورمە زالىنىڭ ءدال ورتاسىندا توسىننان بەرىلگەن «سۋرەتشى شەبەرحاناسى». جەكە كەسكىندەمەلىك جۇمىستار, ەسكيزدەر, نوبايلار, سكەتچبۋكتاردىڭ ىشكى جاعى, ەكسپەريمەنتتىك جانە اياقتالماعان جۇمىستار, ءتىپتى جۇمىس كيىمى – بارلىعى دا ينستاللياتسيانىڭ كورىنىسىنە اينالادى.