قر قارجى مينيسترلىگى قارجىلىق مونيتورينگ اگەنتتىگىنىڭ قاراعاندى وبلىسى بويىنشا اۋماقتىق دەپارتامەنتى اگروونەركاسىپ كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى بويىنشا بولىنگەن قاراجاتتى جىمقىرۋ دەرەگىن اشتى, دەپ حابارلايدى Egemen.kz.
تەرگەۋ امالدارىنىڭ ناتيجەلەرى بويىنشا, 2018-2020 جىلدارى قاراعاندى وبلىسىنىڭ جەكە كاسىپكەرلەرىنىڭ ءبىرى ءوڭىردىڭ 68 شارۋا جانە فەرمەرلىك قوجالىقتارىنىڭ اتىنان كۇن ساۋلەسى پانەلدەرىنىڭ جيىنتىعىن ساتىپ الۋدى ينۆەستيتسيالىق سۋبسيديالاۋعا ءوتىنىم بەرگەن.
بۇل رەتتە, كاسىپكەر شارۋا قوجالىقتارىنا كۇن ساۋلەسى باتارەيالارىنىڭ ءاربىر جيىنتىعى ءۇشىن 3,1 ميلليون تەڭگەگە ساتۋ تۋرالى جالعان شارتتار جاساعان.
«جەكە كاسىپكەر نەگىزسىز العان سۋبسيديالاردىڭ جالپى سوماسى 253 ميلليون تەڭگەدەن اسادى. قازىرگى ۋاقىتتا قىلمىستىق ءىس سوتقا جولداندى», دەلىنگەن قر قارجىلىق مونيتورينگ اگەنتتىگىنىڭ ءباسپاسوز قىزمەتى تاراتقان اقپاراتتا.