نۇر-سۇلتاندا اۋدانى 1200 شارشى مەتردى قۇرايتىن ينكليۋزيۆتى الاڭ اشىلادى. ەرەكشە قاجەتتىلىكتى تالاپ ەتەتىن بالالارعا ارنالعان بۇل كەڭىستىك وسى جىلدىڭ اياعىنا دەيىن پايدالانۋعا بەرىلۋى مۇمكىن, دەپ حابارلايدى Egemen.kz.
جاڭا الاڭ بوتانيكالىق ساياباق اۋماعىندا ورنالاسادى.
«ەسىل اۋدانىندا 1300-دەي ەرەكشە بالا تۇرادى. ولاردىڭ وزگە بالالار سەكىلدى الاڭسىز ويناپ, كوڭىل كوتەرۋىنە, شىنىعۋىنا قاۋىپسىز كەڭىستىك كەرەك. ءۇش جىل بۇرىن مەتسەناتتاردىڭ كومەگىمەن ورتالىق پاركتە العاشقى ينكليۋزيۆتى الاڭ اشقان بولاتىنبىز. اراعا ۋاقىت سالىپ, بوتانيكالىق ساياباق اۋماعىندا ەرەكشە بالالارعا ارنالعان ەكىنشى الاڭ سالعالى جاتىرمىز. بۇل – قالاداعى ەڭ ۇلكەن ينكليۋزيۆتى الاڭ بولعالى تۇر, ونىڭ اۋدانى 1200 شارشى مەترگە تەڭ. وسى جىلدىڭ اياعىنا دەيىن جۇمىستى اياقتاۋ ءۇشىن قۇرىلىستى جىلدامداتامىز», دەيدى ەسىل اۋدانىنىڭ اكىمى بەرىك جاكەنوۆ.
سونداي-اق ەسىل اۋدانى اۋماعىندا باسقا دا اباتتاندىرۋ جۇمىستارى جۇرگىزىلۋدە. بۇگىنگە دەيىن ەسىل وزەنى جاعاسىنداعى پارك رەكونسترۋكتسيادان وتكىزىلدى, «استانا وپەرا» تەاترى ماڭىنا جوندەۋ جۇرگىزىلدى, دارىگەرلەر اللەياسى مەن ەمەن اللەياسى اشىلدى, اتىراۋ كوپىرىنىڭ توسەمى اۋىستىرىلدى. قازىرگى تاڭدا جەتى جىل بويى رەكونسترۋكتسيا جۇرگىزىلمەگەن ورتالىق پاركتىڭ تاقتالارى مەن كەسپە تاستارى اۋىستىرىلىپ جاتىر. سپورتپەن اينالىساتىن تۇرعىنداردىڭ وتىنىشىمەن «سەرۋەن» كوپىرى استىندا تروتۋار سالىنۋدا.
اۋدانداعى اۋلالار دا جاڭا كەيىپكە ەنۋدە. بيىل 38 اۋلادا كەشەندى اباتتاندىرۋ جانە جوندەۋ-قالپىنا كەلتىرۋ جۇمىسى اياقتالادى. ودان بولەك, اۋدان اۋماعىندا 2 جاڭا گۇلزار اشىلادى.
«اۋلالاردى كەشەندى اباتتاندىرۋ بارىسىندا تەننيس ويناۋعا ارنالعان ۇستەلدەر, گيمناستيكالىق الاڭدار, فۋتبول جانە باسكەتبول الاڭدارى, تىنىش دەمالىس ورىندارى, workout-زونالار, جاتتىعۋ زونالارى, بالالار الاڭقايلارى, سونداي-اق ءۇي جانۋارلارىن قىدىرتۋعا ارنالعان زونالار پايدا بولادى. مۇنىمەن قوسا حوككەي كورتىن دا سالامىز. قىستا وندا بالالار حوككەي ويناپ, ال جازدا فۋتبول الاڭى رەتىندە پايدالانا الادى», دەيدى ەسىل اۋدانى اكىمى اپپاراتىنىڭ اباتتاندىرۋ ءبولىمى باسشىسى جارقىن ايتجانوۆ.
ايتا كەتسەك, بىلتىر ەسىل اۋدانىنداعى 32 اۋماق اباتتاندىرىلعان بولاتىن, اسىرەسە تۇرعىن الاپتارعا ەرەكشە نازار اۋدارىلدى. بيىل جاۋاپسىز قۇرىلىس يەلەرى سالعان اۋلالار مەن ون جىلدان اسا جوندەۋ كورمەگەن الاڭقايلارعا ايرىقشا كوڭىل ءبولىنىپ وتىر.