پاۆلودار وبلىسىنىڭ اكىمى ابىلقايىر سقاقوۆ ءوزىنىڭ جاڭا ورىنباسارىن اكىمدىكتە وتكەن جينالىستا تانىستىردى, دەپ حابارلايدى Egemen.kz.
«پاۆلودار» الەۋمەتتىك-كاسىپكەرلىك كورپوراتسياسىنىڭ بۇرىنعى باسشىسى وڭىردەگى اۋىل شارۋاشىلىعى, جەر قاتىناستارى, ۆەتەريناريا, قورشاعان ورتا جانە سۋ رەسۋرستارى, جۇمىسپەن قامتۋ جانە الەۋمەتتىك باعدارلامالار, سونداي-اق, تۋريزم جانە سپورت سالالارىن باسقارادى.
ايماق باسشىسىنىڭ جاڭا ورىنباسارى جەرگىلىكتى شارۋالاردىڭ بەيىندىك قارجى ينستيتۋتتارىمەن جانە ورتالىق مەملەكەتتىك ورگاندارمەن بايلانىسىن قامتاماسىز ەتۋى كەرەك.
مەيرام ۋتەشوۆتىڭ ەكونوميكا جانە اگروونەركاسىپتىك كەشەندى قولداۋ سالاسىنداعى ءتيىستى تاجىريبەسىن اتاپ وتكەن وبلىس اكىمى وسى جانە باسقا دا باعىتتارداعى ناقتى مىندەتتەر قاتارىن بەلگىلەپ بەردى. ناقتى ايتقاندا, ابىلقايىر سقاقوۆ اۋىل شارۋاشىلىعى سالاسى وكىلدەرىنىڭ سۋبسيديالار الۋ مەحانيزمىن جەتىلدىرۋ جانە اۋىل شارۋاشىلىعى ونىمدەرىن وڭدەۋ ءۇشىن جاعداي جاساۋ قاجەتتىلىگىن اتاپ ءوتتى.
«شارۋالاردىڭ كابينەتتەردى ارالاپ, بىرەۋلەردىڭ تەلەفوندارىن ىزدەپ جۇرۋگە ۋاقىتتارى جوق. ولاردىڭ جۇمىسى كوكونىس پەن جەمىستەر ءوسىرۋ, ءسۇتتى-تاۋارلى فەرمالار, كوكونىس قويمالارىن سالۋ جانە تاعىسىن تاعى. نەگىزىندە, بۇل دەگەنىمىز جەكە ينۆەستيتسيالار, ولاردىڭ ءوڭىر ەكونوميكاسىنا قۇيىلۋى ءۇشىن ءبىز بارىنشا جاعداي جاساۋىمىز كەرەك», دەدى وبلىس اكىمى.
مەيرام ۋتەشوۆ 1978 جىلى قوستاناي وبلىسىندا دۇنيەگە كەلگەن.
1999 جىلى ا. بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىن «ەكونوميكا جانە مەنەدجمەنت», ال, 2005 جىلى «زاڭگەر» ماماندىعى بويىنشا اياقتاعان.
ەڭبەك جولىن 2001 جىلى قوستاناي وبلىسىنىڭ ەكونوميكا جانە ساۋدا دەپارتامەنتىندە جەتەكشى مامان رەتىندە باستادى. وسى وڭىردە ەكونوميكا جانە ساۋدا دەپارتامەنتىندە, شاعىن بيزنەستى قولداۋ باسقارماسىندا, كاسىپكەرلىك جانە ونەركاسىپ دەپارتامەنتىندە باسشىلىق لاۋازىمداردى اتقاردى.
ءتورت جىلدان استام ۋاقىت وبلىستىق كاسىپكەرلىك جانە ونەركاسىپ باسقارماسىنا باسشىلىق ەتىپ, ەكى جىلدان استام مەرزىم جىتىقارا اۋدانىنىڭ اكىمى بولدى. 2016-2020 جىلدار ارالىعىندا ەلوردادا, ونىڭ ىشىندە «اگرارلىق-كرەديتتىك كورپوراتسيا» اق-دا جۇمىس ىستەدى.
«پاۆلودار» اكك-ءنىڭ باسشىسى بولىپ تاعايىندالعانعا دەيىن نەسيەلىك سەرىكتەستىكتەردى دامىتۋ دەپارتامەنتىنىڭ ديرەكتورى بولدى. جينالىس بارىسىندا باسقا دا ماسەلەلەر تالقىلاندى. جاڭا وقۋ جىلىنىڭ باستالۋىن ەسكەرگەن ابىلقايىر سقاقوۆ ءبىلىم مەكەمەلەرىندە ەپيدەميولوگيالىق رەجيمنىڭ ساقتالۋىن باقىلايتىن مونيتورينگ توپتار قۇرۋدى تاپسىردى.
سونداي-اق, ايماق باسشىسى بالالاردىڭ ەپيدەميولوگيالىق قاۋىپسىزدىگىن قامتاماسىز ەتۋ ءۇشىن مەكتەپ اۆتوبۋستارىنىڭ مارشرۋتتارىن ۇيىمداستىرۋدى تاپسىردى. مۇنداي قوعامدىق كولىك پيلوتتىق رەجيمدە پاۆلودار جانە ەكىباستۇز قالالارىندا جۇرەتىن بولادى.