مينيسترلىكتىڭ ورتالىق اپپاراتىنىڭ جەدەل-تەرگەۋ توبى جامبىل وبلىسىندا بولعان جارىلىستى تەكسەرىپ, كۋاگەرلەردەن جاۋاپ الىپ جاتىر. بۇل تۋرالى بريفينگتە ۆەدومستۆونىڭ رەسمي وكىلى ءنۇردىلدا وراز حابارلادى, دەپ جازادى Egemen.kz.
«جامبىل وبلىسىنداعى اسكەري ءبولىمنىڭ اۋماعىندا بولعان جارىلىستاردى تولىق جانە وبەكتيۆتى تەكسەرۋ ءۇشىن ءىىم ورتالىق اپپاراتىنىڭ تاجىريبەلى قىزمەتكەرلەرىنىڭ اراسىنان جەدەل-تەرگەۋ توبى قۇرىلدى.
تەرگەۋ قر قىلمىستىق كودەكسىنىڭ 462-بابىنىڭ 3-بولىگى بويىنشا ءجۇرىپ جاتىر», دەدى ن.وراز.
ونىڭ ايتۋىنشا, جەدەل-ىزدەستىرۋ شارالارى, ونىڭ ىشىندە جابىرلەنۋشىلەر مەن كۋاگەرلەردەن جاۋاپ الۋ, سونداي-اق زاقىمدالعان وبەكتىلەردى تەكسەرۋ ءجۇرىپ جاتىر.
ء«تيىستى سوت-مەديتسينالىق ساراپتامالار تاعايىندالدى. وقيعا ورنىندا ساپەرلەر مەن كينولوگتار بريگاداسى ىزدەستىرۋ جۇرگىزىپ ءجۇر. قازىرگى ۋاقىتتا 15 اسكەري قىزمەتشى مەن قۇتقارۋشىنىڭ ءمايىتى تابىلدى», دەپ قوستى ءىىم رەسمي وكىلى.
مينيسترلىكتىڭ مالىمەتىنشە, قوعامدىق ءتارتىپتى ساقتاۋعا جانە وقيعانىڭ سالدارىن جويۋعا 800-دەن استام پوليتسيا قىزمەتكەرى مەن ۇلتتىق ۇلاننىڭ ساربازدارى, 113 ارنايى تەحنيكا جۇمىلدىرىلدى.
پوليتسيا وقيعا ورنىنا كىرۋ جولدارىن, ونىڭ ىشىندە تەمىرجولدى ۋاقىتشا جاۋىپ تاستادى جانە وقيعا ورنىنا جەدەل جاردەمدى بىرگە الىپ ءجۇردى. توتەنشە جاعداي ايماعىنا جاقىن جەردە قاينار, جىبەك جولى, ۇشبۇلاق ەلدى مەكەندەرىنەن 700-دەن استام ادام ەۆاكۋاتسيالاندى, 2350 پويىز جولاۋشىسىن اۆتوبۋسپەن تاسىمالداۋ ۇيىمداستىرىلدى, تۇرعىندار اراسىندا ءتۇسىندىرۋ جۇمىستارى جۇرگىزىلدى.
«بايزاق اۋىلىنىڭ №4 ليتسەيىندە جەرگىلىكتى اتقارۋشى, قۇقىق قورعاۋ جانە باسقا دا مەملەكەتتىك ورگانداردىڭ قاتىسۋىمەن جەدەل شتاب قۇرىلدى. قوعامدىق ءتارتىپتى ساقتاۋ ءۇشىن ۇلتتىق ۇلان مەن پوليتسەيلەر تاۋلىك بويى كەزەكشىلىك ەتەدى. وقيعا ورنىندا جاعداي تۇراقتى جانە قۇقىق قورعاۋ ورگاندارىنىڭ باقىلاۋىندا», دەدى ءنۇردىلدا وراز.