مەملەكەت باسشىسى ساۋد ارابياسى كورولدىگىنىڭ تاق مۇراگەرىمەن سويلەستى

تاراپتار مۇسىلمان جىل ساناۋى بويىنشا جاڭا حيجرا جىلىنىڭ باستالۋىنا وراي ءبىر-ءبىرىن قۇتتىقتاپ, ەكى ەل اراسىنداعى ىنتىماقتاستىقتىڭ قازىرگى جاعدايى مەن ونى نىعايتۋ پەرسپەكتيۆالارىن تالقىلادى.

قازاقستان پرەزيدەنتى بۇگىنگى ەكىجاقتى قاتىناستار دەڭگەيىن وڭ باعالاپ, قوسىمشا سەرپىن بەرۋ مۇمكىندىكتەرىن قاراستىرۋ قاجەتتىگىن ايتتى. وسى ورايدا, قاسىم-جومارت توقاەۆ پەن ساۋد ارابياسىنىڭ تاق مۇراگەرى مەملەكەتتەر اراسىنداعى ىقپالداستىقتى جاڭا جوبالارمەن تولىقتىرىپ, ولاردى بىرلەسە جۇزەگە اسىرۋعا باعىتتالعان «قازاقستان - ساۋد ارابياسى» ۇيلەستىرۋ كەڭەسىن قۇرۋ تۋرالى باستامانى تولىقتاي قولدادى.

حانزادا مۇحاممەد بەن سالماننىڭ ايتۋىنشا, ەر-رياد قازاق نارىعىنداعى ينۆەستيتسيالىق الەۋەتىن ارتتىرۋعا مول مۇمكىندىك بار ەكەنىنە كوز جەتكىزىپ وتىر.

مەملەكەت باسشىسى بۇل پىكىرمەن كەلىسە وتىرىپ, ساۋد ارابياسى كورولدىگىنىڭ تاق مۇراگەرىن ەكىجاقتى ىقپالداستىقتىڭ بارلىق باعىتتارىن تالقىلاۋ ماقساتىندا قازاقستانعا ساپارمەن كەلۋگە شاقىردى.

حانزادا مۇحاممەد ءال ساۋد قاسىم-جومارت توقاەۆتىڭ شاقىرۋىن ريزاشىلىقپەن قابىل الىپ, مەرزىمدەرىن ديپلوماتيالىق ارنالار ارقىلى پىسىقتايتىنىن جەتكىزدى.

قول جەتكىزىلگەن ۋاعدالاستىقتاردى جۇزەگە اسىرۋ ماقساتىندا ەكى ەل ۇكىمەتتەرى مەن سىرتقى ىستەر مينيسترلىكتەرىنە ەكىجاقتى ماسەلەلەر مەن حالىقارالىق كۇن تارتىبىندەگى تاقىرىپتار بويىنشا تىعىز بايلانىستار ورناتۋ تۋرالى تاپسىرما بەرۋگە كەلىستى.

سونداي-اق تاراپتار اۋعانستانداعى جاعدايدى جانە ونىڭ وڭىرلىك قاۋىپسىزدىك ءۇشىن ىقتيمال سالدارى مەن قاۋىپ-قاتەرلەرىن جان-جاقتى تالقىلادى. اتالعان ەلدەگى احۋالعا قاتىستى الاڭداۋشىلىق ءبىلدىرىپ, اۋعان ەلىنىڭ تۇراقسىزدىق باستاۋىنا اينالماي, بەيبىت جولمەن شەشىلەتىنىنە ءۇمىت ارتتى.