ەقىۇ پارلامەنتتىك اسسامبلەياسىنىڭ توراعاسى مارگارەت سەدەرفەلتتىڭ باستاماسىمەن ۇيىمنىڭ اۋعانستانداعى جاعدايعا ارنالعان وتىرىسى ءوتتى. ونلاين رەجيمدە ۇيىمداستىرىلعان ءىس-شاراعا تاجىكستان, تۇركىمەنستان جانە وزبەكستان پارلامەنتتەرى دەلەگاتسيالارىنىڭ جەتەكشىلەرى, ۇيىمنىڭ وسى ەلدەردەگى كەڭسەسىنىڭ, سونداي-اق ەقىۇ قاقتىعىستاردىڭ الدىن الۋ جونىندەگى ورتالىعىنىڭ وكىلدەرى قاتىستى, دەپ جازادى Egemen.kz.
قاتىسۋشىلار اۋعانستانداعى جاعدايعا نازار اۋدارىپ, سوعان بايلانىستى ورتالىق ازيا ەلدەرىنىڭ قاۋىپسىزدىگىنە ءتونۋى مۇمكىن قاتەردى تالقىلادى.
پىكىر الماسۋ بارىسىندا ەقىۇ پا توراعاسىنىڭ ورىنباسارى, قر پارلامەنتى سەناتىنىڭ ۆيتسە-سپيكەرى اسقار شاكىروۆ اسسامبلەيانىڭ قولدانىستاعى مانداتى اياسىندا اۋعان حالقىنىڭ سەنىمىن قالپىنا كەلتىرۋ شارالارىنا توقتالدى. قازىرگى تاڭدا حالىقارالىق كواليتسيا كۇشتەرىنىڭ وسى ەلدەن شىعارىلۋىنا بايلانىستى اۋعانستان ازاماتتارىندا ەرتەڭگى كۇنگە دەگەن سەنىمسىزدىك باسىم ەكەنى بەلگىلى.
ورتالىق ازيا ەلدەرى بوسقىنداردىڭ جاپپاي كوشۋى كەزىندە ايماقتاعى جاعدايدىڭ تۇراقسىزدانۋىنا جانە وڭىرگە راديكالدى اعىم وكىلدەرىنىڭ شوعىرلانۋ مۇمكىندىگىنە الاڭداۋشىلىق ءبىلدىردى.
ۆيتسە-سپيكەر اۋعان جەرىندەگى جاعدايدى تۇراقتاندىرۋ جۇمىستارىنا قازاقستاننىڭ قاتىسىپ جاتقانىن اتاپ ءوتتى. ول قازاقستان پرەزيدەنتى قاسىم-جومارت توقاەۆتىڭ شەشىمىنە سايكەس الماتىعا بۇۇ-نىڭ اۋعانستانعا كومەك كورسەتۋ جونىندەگى ميسسياسىنىڭ ۋاقىتشا كەڭسەسى كوشىرىلگەنىن تىلگە تيەك ەتتى. قازىرگى تاڭدا ميسسيا قىزمەتكەرلەرىنە جۇمىس ىستەۋگە جانە تۇرۋعا قاجەتتى جاعداي جاسالعان.
«وتىرىس سوڭىندا پارلامەنتتەر وكىلدەرى اۋعانستانداعى احۋالعا, ونىڭ ەقىۇ ايماعىنداعى قاۋىپسىزدىككە ىقپالى تۇرعىسىنان تۇراقتى مونيتورينگ جۇرگىزۋ كەرەكتىگى تۋرالى ۇسىنىستار ايتتى. سونداي-اق, بۇل ماسەلەنى پارلامەنتتىك اسسامبلەيانىڭ الداعى ءىس-شارالارىنىڭ كۇن تارتىبىنە ەنگىزۋ قاجەتتىگى دە ءسوز بولدى», دەپ جازادى ۆەدومتسۆونىڭ ءباسپاسوز قىزمەتى.