الماتى قالاسىندا جاڭا مەكتەپتەر سالىنىپ, ەسكى ءبىلىم بەرۋ ۇيىمدارىندا سەيسميكالىق توزىمدىلىك جۇمىستارى جۇرگىزىلۋدە. بۇل تۋرالى الماتىنىڭ جايلى قالالىق ورتا باسقارماسىنىڭ باسشىسى ساپار نۇراشەۆ ءمالىم ەتتى, دەپ حابارلايدى Egemen.kz.
باسقارما باسشىسىنىڭ ايتۋىنشا, جىل سوڭىنا دەيىن 48 الەۋمەتتىك نىساننىڭ قۇرىلىسىن اياقتاۋ جوسپارلانعان. ونىڭ ىشىندە 38 نىساننىڭ قۇرىلىسى ءجۇرىپ جاتسا, قالعان 10 مەكتەپتە سەيسميكالىق توزىمدىلىك جۇمىستارى جۇرگىزىلۋدە.
«قازىرگى ۋاقىتتا 12 600 وقۋشىعا ارنالعان سەگىز مەكتەپتىڭ, 17 مەكتەپكە ارنالعان قوسالقى عيماراتتار مەن №7 قالالىق اۋرۋحانانىڭ قۇرىلىسى ءجۇرىپ جاتىر. كىشى الماتى وزەنىنىڭ جاعالاۋىن جانە جامبىل كوشەسىن دوستىق داڭعىلىنان ناۋرىزباي باتىر كوشەسىنە دەيىن رەكونسترۋكتسيالاۋ اياقتالۋعا جاقىن», دەدى سپيكەر.
سپيكەردىڭ ايتۋىنشا, الماتىداعى بارلىق جاڭا مەكتەپتەردى سالۋدا الەمدىك ستاندارتتار ەسكەرىلەتىن بولادى. ول قازىرگى بالالاردىڭ زاماناۋي قۇرال-جابدىقتارمەن جابدىقتالعان جاڭا كەڭىستىكتە ءبىلىم الۋعا قىزىعۋشىلىق تانىتادى دەپ ەسەپتەيدى. سوندىقتان مەگاپوليستە جاڭا تيپتەگى مەكتەپتەردىڭ قۇرىلىس پروتسەسى جالعاسادى.