قر پرەمەر-ءمينيسترى اسقار ءماميننىڭ توراعالىعىمەن وتكەن ۇكىمەت وتىرىسىندا ۇلتتىق حالىق ساناعىنا دايىندىق بارىسى قارالدى, دەپ جازادى Egemen.kz قازاقستان رەسپۋبليكاسى پرەمەر-ءمينيسترىنىڭ رەسمي اقپاراتتىق رەسۋرسىنا سىلتەمە جاساپ.
مەملەكەت باسشىسى قاسىم-جومارت توقاەۆتىڭ تاپسىرماسى بويىنشا 2021 جىلعى 1 قىركۇيەكتەن 30 قازان ارالىعىندا حالىق ساناعىن وتكىزۋ جوسپارلانۋدا.
ساناق پروتسەسىن اۆتوماتتاندىرۋ ءۇشىن قاعاز تاسىمالداۋشىلاردان تولىق باس تارتا وتىرىپ, تسيفرلىق تەحنولوگيالار قولدانىلاتىن بولادى. ساناق ەكى تاسىلمەن جۇرگىزىلەدى: sanaq.gov.kz ارنايى سايتىنداعى ينتەرنەت-ساۋالناما ارقىلى 45 كۇن ىشىندە ينتەرنەت-ساۋالناما جۇرگىزۋ جانە ەلەكتروندى پلانشەتتەردى قولدانا وتىرىپ, ينتەرۆيۋەرلەرگە ادەتتەگى جاپپاي ساۋالناما جۇرگىزۋ. قوسىمشا Aitu Messenger وتاندىق ءموبيلدى قوسىمشاسى ارقىلى ساناقتان ءوتۋ مۇمكىندىگى بەرىلەتىن بولادى.
رەسپوندەنتتەر حالىققا قىزمەت كورسەتۋ ورتالىقتارىندا, اكىمدىكتەردە, پوشتا بولىمشەلەرىندە, مەكتەپتەر مەن ساۋدا ورتالىقتارىندا ورنالاساتىن ارنايى ۇيىمداستىرىلعان نۇسقاۋلىق ۋچاسكەلەردە ساناقتان وتە الادى. ساناق جۇرگىزۋ كەزىندە 32 مىڭ ادام جۇمىسقا ورنالاستىرىلادى. ۇكىمەت باسشىسى الماتى جانە نۇر-سۇلتان قالالارى, قوستاناي جانە شىعىس قازاقستان وبلىستارى اكىمدىكتەرىنىڭ حالىق ساناعىنا دايىندىعى بويىنشا جۇمىسىنا وڭ باعا بەردى.
سونىمەن قاتار ماڭعىستاۋ, اقتوبە وبلىستارى جانە شىمكەنت قالاسى اكىمدىكتەرىنىڭ ءتيىستى جۇمىس قارقىنىنىڭ جەتكىلىكسىزدىگىن اتاپ ءوتتى. پرەمەر-مينيستر قىسقا مەرزىمدە مىندەتتى ۆاكتسينالاۋدان وتكەن جۇمىسكەرلەردىڭ حالىق ساناعىن وتكىزۋ ءۇشىن قاجەتتى سانىن جۇمىسقا ورنالاستىرۋدى قامتاماسىز ەتۋدى تاپسىردى.
وڭىرلەردىڭ اكىمدەرىنە, ۇلتتىق ستاتيستيكا بيۋروسىنا جانە ىشكى ىستەر, دەنساۋلىق ساقتاۋ مينيسترلىكتەرىنە حالىق ساناعىن وتكىزۋ بويىنشا بارلىق ۇيىمداستىرۋشىلىق ماسەلەلەردى پىسىقتاۋ تاپسىرىلدى. اقپارات جانە قوعامدىق دامۋ مينيسترلىگىنە ۇلتتىق ستاتيستيكا بيۋروسىمەن جانە اكىمدىكتەرمەن بىرلەسىپ, حالىق اراسىندا ۇلتتىق ساناقتىڭ جۇرگىزىلۋ ماقساتى مەن ءتارتىبى تۋرالى ءتۇسىندىرۋ جۇمىستارىن كۇشەيتۋ تاپسىرىلدى.
«بۇل ءىس-شارانىڭ الەۋمەتتىك-ەكونوميكالىق ماڭىزى زور. ساناق ناتيجەسى بويىنشا مەيلىنشە ءدال دەرەكتەر بولىپ تابىلاتىن ءارى ەلدەگى احۋالدى تالداۋعا, بولجام جاساۋعا جانە ءتيىستى شەشىمدەر قابىلداۋعا نەگىز بولاتىن كوپتەگەن كورسەتكىشتەر الىنادى. سوندىقتان ەلىمىزدىڭ ءار ازاماتىنىڭ ساناققا قاتىسۋىنىڭ ماڭىزى وتە زور», دەدى ا.مامين.