تاياۋدا عانا توكيودا وتكەن ءحححىى جازعى وليمپيا ويىندارىنىڭ قورىتىندىسى قازاقستاندىق سپورتسۇيەر قاۋىمدى قالىڭ ويدىڭ تەرەڭىنە باتىرىپ كەتتى. توكيوعا شەرۋ تارتقان قازاقستاننىڭ وليمپيالىق كومانداسىنىڭ قۇرامىندا قاراعاندى وبلىسىنىڭ جەتى سپورتشىسى ەل نامىسىن قورعادى.
اتاپ ايتساق, ولاردىڭ قاتارىندا بالۋان, وليمپيادا جۇلدەگەرى ەلميرا سىزدىقوۆا, بوكسشى, الەم چەمپيوناتىنىڭ جۇلدەگەرى ابىلايحان ءجۇسىپوۆ, دزيۋدوشىلار, حالىقارالىق تۋرنيرلەردىڭ جەڭىمپازدارى مەن جۇلدەگەرلەرى جانساي سماعۇلوۆ پەن يسلام بوزباەۆ, ارتىستىك ءجۇزۋ شەبەرلەرى الەكساندرا جانە ەكاتەرينا نەميچتەر, جەڭىل اتلەتشى ماريا وۆچيننيكوۆا بولدى.
وكىنىشكە قاراي, ءبىز ءۇمىت ارتقان سپورتشىلارىمىز دودانىڭ باستاپقى كەزەڭىندە ءسۇرىنىپ, ۇيگە ەرتە قايتتى. ياعني ەل سپورتىنىڭ ناشار كورسەتكىشىنە قاراعاندىلىق سپورتشىلار دا سۇبەلى «ۇلەس قوستى» دەپ ايتۋعا بولادى.
جاسىراتىنى جوق, جاپونيادا اياقتالعان ءدۇبىرلى دودا قاراعاندى وبلىسى سپورتىنىڭ كەيىنگى جەتى-سەگىز جىلداعى ءجۇرىپ وتكەن جولىنىڭ, جالپاق تىلمەن ايتقاندا جەتكەن جەرىنىڭ قانداي ەكەندىگىن كوزگە شۇقىپ كورسەتتى. ياعني ءبىز وسىدان بىرنەشە جىل بۇرىن ىجداعاتسىز جاسالعان ءبىرشاما دۇنيەنىڭ ىڭىرشاعى قالاي شىعىپ, قانداي «جەمىسىن» بەرگەنىن ەندى بايقاپ وتىرمىز. ەگەر الداعى ۋاقىتتا اۋعان جۇك تۇزەلمەسە, 2024 جىلى پاريجدە وتەتىن وليمپيا ويىندارىندا دا ءدال وسى كەپتى كيەرمىز-اۋ دەگەن ۋايىم باسىم.
قاراعاندىلىق سپورتشىلاردىڭ توكيودا ءساتسىز ونەر كورسەتۋىنىڭ ءبىر سەبەبى وقۋ-جاتتىعۋ جيىندارىن ۇيىمداستىرۋ بارىسىندا جىبەرىلگەن ولقىلىقتاردا جاتىر دەگەن سىڭايداعى پىكىر ءبىلدىردى, ارنايى حابارلاسقانىمىزدا وبلىستىق دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلاەۆ.
«ماسەلەن, – دەيدى تاعايىندالعانىنا ءبىر جىلدان ەندى اسقان وبلىس سپورتىنىڭ باسشىسى, – وقۋ-جاتتىعۋ جيىندارىنىڭ جۇيەلى تۇردە وتۋىنە بىلتىردان بەرگى پاندەميانىڭ وراسان زور نۇقسان كەلتىرگەنى راس. ارينە, ءبارىن الەمنىڭ ءوزىن ابىگەرگە سالعان ىندەتكە جابۋدان اۋلاقپىن. ايتايىن دەگەنىم – كارانتيندىك شەكتەۋلەرگە بايلانىستى شەتەلدەگى وقۋ-جاتتىعۋ جيىندارىنان قول ۇزگەن سپورتشىلارىمىز ءوز ىشىمىزدە دايىندالۋعا ءماجبۇر بولدى. مىنە, وسى جەردە بىزدەگى وقۋ-جاتتىعۋ جيىندارىنىڭ ادىستەمەسى مۇنداي جۇكتەمەنى الىپ جۇرۋگە ءازىر بولماي شىقتى. بۇل – شۇعىل تۇردە ساراپتاۋدى, جان-جاقتى زەرتتەۋدى, سوسىن بەلگىلى ءبىر قورىتىندىسىن شىعارۋدى قاجەت ەتەتىن تامىرى تەرەڭگە كەتكەن ماسەلە».
ارقا سپورتىنىڭ باسشىسى ايتقان ءسوزدىڭ جانى بار. بيىل, مىسالى, قاراعاندى وبلىسىنداعى جوعارى سپورتتىق شەبەرلىك بويىنشا ۇلتتىق قۇراما كوماندالار ساپىندا جۇرگەن سپورتشىلارعا, ولاردىڭ باپكەرلەرىنە دەگەن قامقورلىقتا قاپى بولمادى. ءبىر سوزبەن ايتقاندا, ەل نامىسىن قورعايتىن اتلەتتەرىمىز ەشتەڭەدەن تارلىق كورمەي, الدا تۇرعان دودالى جارىستارعا الاڭسىز دايىندالۋ مۇمكىندىگىنە يە بولعان ەدى.
وكىنىشتىسى سول, ارتىلعان سەنىم مەن ءۇمىت اقتالمادى. جالپى, توكيو وليمپياداسىنىڭ قورىتىندىسى بويىنشا ۇلكەن باسقوسۋلار ءوتىپ, كەڭ اۋقىمدا تالقىلاۋلار بولادى, ءتيىستى قورىتىندى شىعارىلادى دەگەندى ايتادى تەمىرحان ابىلاەۆ.
«ۋاقىت دەگەن – جۇيرىك. كەلەسى پاريج وليمپياداسىنا ءۇش جىل ەمەس, ەكى جارىم جىل عانا قالدى دەي بەرۋگە بولادى. ەگەر ءبىز شۇعىل تۇردە كەشەندى شەشىمدەر قابىلداماساق, توكيوداعى جاعدايدى تاعى دا باستان كەشەتىنىمىز انىق. ءدال قازىرگى ۋاقىتتا ءبىزدىڭ الدىمىزدا زور مىندەت تۇر. ءبىز ءۇشىن تالانتتى دەگەن سپورتشىلاردى تاۋىپ, ولاردى باۋلۋ قانشالىقتى ماڭىزدى بولسا, ءوز ىسىنە جان-تانىمەن بەرىلگەن بىلىكتى جاتتىقتىرۋشىلار قۇرامىن ءوسىرىپ شىعارۋ دا – كۇن تارتىبىندە وتكىر تۇرعان باستى ماسەلەنىڭ ءبىرى. مىنە, وسى جانە باسقا دا كەزەك كۇتتىرمەيتىن شارۋالار جۇزەگە اسقاندا عانا بىزدەن ساپيەۆتەر مەن سىزدىقوۆالاردىڭ ءىزباسارلارى شىعادى», دەيدى سپورت باسشىسى.
ءيا, تەمىرحان ابىلاەۆتىڭ بۇل سوزىمەن كەلىسپەسكە بولماس. وسى ورايدا, جاتتىقتىرۋشىنىڭ سپورتشى ومىرىندە ماڭىزدى ءرول وينايتىن باستى تۇلعا ەكەنىن تاعى ءبىر مارتە قايتالاپ ايتۋدىڭ ارتىقتىعى جوق. باپكەردىڭ دەڭگەيى – سپورتشى جەتىستىگىنىڭ ولشەمى. ماسەلەن, بوكستان توكيو وليمپياداسىنا قاتىسۋشى ابىلايحان ءجۇسىپوۆتى الايىق. اتالعان بىلعارى قولعاپ شەبەرى جاسوسپىرىمدەر مەن جاستار اراسىنداعى حالىقارالىق دەڭگەيدەگى جارىستاردا جۇلدە بىتكەننىڭ تۇگەلىن جەڭىپ الدى. بىراق ەرەسەكتەر اراسىنداعى دودالاردا بۇل بوكسشى ءبىز كۇتكەن دەڭگەيدەن كورىنە المادى. وسى جەردە ابىلايحان ءجۇسىپوۆتىڭ كەيىنگى كەزدەگى ءساتسىز ونەرىنىڭ ءبىر سەبەبى جەكە باپكەردىڭ بىلىكتىلىك دەڭگەيىندە جاتقان جوق پا دەگەن دە وي كەلەدى.
البەتتە, بۇل – ءبىز ءۇمىت ارتقان اتلەتتەردىڭ كوبىنىڭ باسىندا بار جاعداي. قاراعاندىلىق دزيۋدوشىلار جانساي سماعۇلوۆ پەن يسلام بوزباەۆ تۋراسىندا دا ايتىلار سىن از بولماي تۇر. بۇل سپورتشىلاردىڭ تورتجىلدىقتىڭ باستى باسەكەسىندە الا-قۇلا ونەر كورسەتۋى – وليمپيادا الدىنداعى دايىندىققا جەتكىلىكتى تۇردە ءمان بەرمەگەندىكتىڭ سالدارى دەپ باتىل تۇجىرىم جاساۋعا نەگىز بەرەدى. مۇنى باپكەرلەر شتابىنىڭ جىبەرگەن كەمشىلىگى, جاتتىعۋ جۇمىستارىن ۇيىمداستىرۋ بارىسىنداعى شالاعايلىق دەسە دە شىندىقتىڭ اۋىلىنان الىس كەتپەگەندىك بولار ەدى.
ءبىر وكىنىشتىسى, كەيبىر اكىم-قارالار سپورتتاعى جەتىستىكتى بۇل سالاعا بولىنگەن قاراجاتتىڭ مولشەرىمەن عانا ولشەيدى. ولارعا سالساڭ, بۇگىنگى بەرگەننىڭ قايتارىمى كۇنى ەرتەڭ بولۋى كەرەك. البەتتە, بۇل تۇبىرىمەن قاتە جانە تاياز تۇسىنىك. چەمپيونداردى تاربيەلەۋ دەگەننىڭ ءوزى شۇمەكتەپ توگىلگەن تەر, شىدامدىلىق پەن قاجىرلىلىق ءوز الدىنا, ۇزاق ۋاقىتتى قاجەت ەتەتىن كۇردەلى ۇدەرىس. بۇل دەگەنىڭىز, سولقىلداعان جاس شىبىقتى ماپەلەپ كۇتىپ, جىلداردى اراعا سالىپ بارىپ الىپ بايتەرەككە اينالدىرعان سياقتى ەرەن ەڭبەكتىڭ جەمىسى.
«بۇقارالىق جانە بالالار سپورتىن دامىتۋعا كوڭىل ءبولىپ, سول ارقىلى الەمدىك ارەنادا ۇلكەن تابىستارعا قول جەتكىزۋگە ۇمتىلۋ قاجەت», دەگەن مەملەكەت باسشىسىنىڭ ءسوزى سانادا ساعاتتاي سىرتىلداپ-اق تۇر. ءيا, وليمپيادادا ەلدىڭ بايراعىن كوتەرىپ, ءانۇرانىن شىرقاتار ساڭلاق سپورتشىنى بالا كۇنىنەن باۋلۋ – ورتاق ماقساتتىڭ مۇددەسىنە جۇمىلعان باسشىسى بار, قوسشىسى بار, بىرنەشە توپتىڭ الدىنداعى اسقارالى مىندەت. «دارىندى شاكىرت بولعانىمەن, بىلىكتى باپكەر, ولاردى بارىنشا قولداپ وتىراتىن ماماندار مەن باسشىلىق بۇل ىستە ءبىر جاعادان باس, ءبىر جەڭنەن قول شىعارماسا, ەڭبەكتىڭ زايا كەتكەنى دەي بەرىڭىز, – دەيدى تەمىرحان ابىلاەۆ. – ءسوزىمىزدى تۇيىندەر بولساق, باپكەر – الىمدى, شاكىرت – شالىمدى, بۇلارعا دەگەن باسشىلىقتىڭ قامقور پەيىلى تولىمدى بولماي, جوعارى شەبەرلىك سپورتىنىڭ باعى ەشقاشاندا جانباق ەمەس».
ءيا, ەل سپورتىنىڭ الدىندا ەرەسەن زور مىندەت تۇر: سونىڭ ءبىرى – توكيوداعى توقىراۋدان دۇرىس قورىتىندى شىعارىپ, ونى پاريجدەگى بايراقتى باسەكەدە پايداعا جاراتا ءبىلۋ. ەڭ باستىسى, بۇل سالادا بەلەڭ العان تارتىپسىزدىك, بەرەكەسىزدىك, بىلىكسىزدىك, ءبىر سوزبەن ايتقاندا جويداسىز جۇگەنسىزدىك تىيىلعاندا عانا, ابدەن جۇدەپ-جاداعان سپورتىمىز بۇرىنعى جاراۋ كۇيىن قايتا تابار ەدى دەگەنگە سەنگىمىز-اق كەلەدى.
قاراعاندى وبلىسى