«اقوردا» رەزيدەنتسياسى عيماراتىنىڭ شاتىرى جوسپارلى جوندەۋدەن ءوتىپ جاتىر. جۇمىستار مامىر ايىندا باستالسا, قىركۇيەكتە اياقتالادى, دەپ حابارلادى قازاقستان رەسپۋبليكاسى پرەزيدەنتى ءىس باسقارماسىنىڭ ءباسپاسوز قىزمەتى.
جاز بويى تاريحي عيماراتتىڭ ەستەتيكالىق كەلبەتىن بۇزباۋ ءۇشىن نىساننىڭ سىرتىنا قۇرىلىس ساتىلارى ورناتىلماي, ونىڭ ورنىنا نەعۇرلىم جۇمساق تەحنولوگيا تاڭدالدى.
جۇمىسشىلار مەن قاجەتتى ماتەريالداردى شاتىرعا كەدەرگىسىز كوتەرۋ ءۇشىن, جاعالاۋ جاعىنداعى قابىرعانىڭ دەكوراتيۆتى ەرنەۋى الىنىپ, قۇرىلىس پلاتفورماسى ورناتىلدى. جوندەۋ جۇمىستارى اياقتالعان سوڭ دەكوراتيۆتى ەلەمەنت ءوز ورنىنا قايتا بەكىتىلەدى. قازىر ەرنەۋ ساقتاۋ قويماسىندا تۇر.
«اقوردا» رەزيدەنتسياسى 17 جىل بۇرىن سالىنعان. ونىڭ رەسمي اشىلۋى 2004 جىلدىڭ 24 جەلتوقسانىندا ءوتتى. بيىل العاش رەت بىرەگەي عيماراتتىڭ شاتىرىنا جوندەۋ جۇمىستارى جۇرگىزىلۋدە.
پرەزيدەنت رەزيدەنتسياسىنا, سونداي-اق, ۇكىمەت ءۇيى, مينيسترلىكتەر ءۇيى, قارجى مينيسترلىگىنىڭ عيماراتى ءتارىزدى ەڭ ءىرى اكىمشىلىك كەشەندەرىنە تەحنيكالىق قىزمەتتەردى قازاقستان رەسپۋبليكاسى ءپىب «قازاقستان رەسپۋبليكاسى پرەزيدەنتىنىڭ اكىمشىلىگى مەن ۇكىمەتىنىڭ اكىمشىلىك عيماراتتارى ديرەكتسياسى» شارۋاشىلىق جۇرگىزۋ قۇقىعىنداعى رەسپۋبليكالىق مەملەكەتتىك كاسىپورنى كورسە- تەدى.