شىعىس قازاقستان وبلىسىنداعى 533 مەكتەپتە بەينەباقىلاۋ جۇيەسى تالاپقا سايكەس كەلمەيدى, دەپ حابارلايدى Egemen.kz.
بۇگىنگى تاڭدا ءوڭىر بويىنشا 647 مەكتەپ بار. ونىڭ 637-ءسى بەينەباقىلاۋ جۇيەسىمەن جابدىقتالعان. الايدا تەكسەرىس بارىسىندا ءبىلىم وردالارىنىڭ باسىم بولىگىندە بەينەباقىلاۋ جۇيەسىنىڭ دۇرىس جۇمىس ىستەمەيتىندىگى انىقتالدى.
بۇل جايلى شقو ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ باسشىسى زەينەپ ماحسۋتوۆا ءمالىم ەتتى.
«وبلىس مەكتەپتەرىنە جاسالعان مونيتورينگ ناتيجەسىندە, 533 (82,3%) ءبىلىم بەرۋ مەكەمەسىنىڭ بەينەباقىلاۋ جۇيەسى بەكىتىلگەن ستاندارتتارعا سايكەس ەمەستىگى بەلگىلى بولىپ وتىر. سونداي-اق 10 مەكتەپتە كامەرالار دۇرىس جۇمىس ىستەمەي كەلگەن. بارلىق مەكتەپتەر بەينەباقىلاۋ جۇيەسىن قوسىمشا جابدىقتاۋعا جانە جاڭارتۋعا ءوتىنىم بەردى», دەيدى ول.
زەينەپ ماحسۋتوۆانىڭ ايتۋىنشا, اتالعان كەمشىلىكتەردى جويۋ ءۇشىن بيۋدجەتتەن قاجەتتى قاراجات بولىنگەن. وسى جىلدىڭ قىركۇيەك ايىنا دەيىن ءتيىستى جۇمىستار اتقارىلادى دەپ كۇتىلۋدە.