تۇركيا شەكاراداعى باقىلاۋدى كۇشەيتىپ جاتىر. بۇل - ەلگە اۋعان بوسقىندارىنىڭ جاپپاي كەلۋىن بولدىرماس ءۇشىن قولدانىلعان شارا, دەپ حابارلايدى Egemen.kz.
يرانمەن شەكارانىڭ ەڭ ۇزىن بولىگى ورنالاسقان تۇركيانىڭ شىعىسىنداعى ۆان پروۆينتسياسىندا قاۋىپسىزدىك شارالارى كۇشەيتىلگەن.
تۇركيا-يران شەكاراسى ۋچاسكەسىندە 6 شاقىرىم مودۋلدىك بەتون قابىرعا تۇرعىزىلعان. بيلىك جىل سوڭىنا دەيىن شەكارا قابىرعاسىنا تاعى 64 شاقىرىم قوسۋدى جوسپارلاپ وتىر.
ء«بىز بۇكىل الەمگە شەكارامىزدان وتۋگە بولمايتىنىن كورسەتكىمىز كەلەدى. اۋعانستاننان قونىس اۋدارۋشىلار تولقىنى بولمايدى دەگەن ۇمىتتەمىز», دەدى شىعىس شەكاراداعى ۆان مەحمەت پروۆينتسياسىنىڭ گۋبەرناتورى ەمين بىلمەز.
تۇرىك-يران شەكاراسىنداعى قاۋىپسىزدىكتى ونداعان بروندالعان تەحنيكا, دروندار, بەينەكامەرالار, بارلاۋ جانە ۇشقىشسىز ۇشۋ اپپاراتتارى قامتاماسىز ەتەتىنى ايتىلدى.
پاترۋلدىك كولىكتەر يران جاعىنداعى قوزعالىستى تاۋلىك بويى باقىلايدى, ول جەردەن بوسقىندار, كونترابانديستەر مەن كۇرد جاۋىنگەرلەرى تۇركياعا ءجيى وتۋگە تىرىسادى. تۇركيا تاۋلى شەكارادىعى جاعدايدى دا اۋەدەن باقىلاپ وتىر.
بۇل ۋاقىتتا تۇركيا پرەزيدەنتى رەجەپ تايىپ ەردوعان ەۋروپا ەلدەرىن بوسقىنداردىڭ جاڭا لەگىنە جاۋاپكەرشىلىكتى الۋعا شاقىردى. ول تۇركيا «بوسقىندارىدىڭ ەۋروپالىق قويماسىنا»اينالعىسى كەلمەيتىنىن ەسكەرتتى.
بيلىك ەسەپتەۋى بويىنشا, تۇركيادا 182 مىڭ تىركەلگەن جانە 120 مىڭعا جۋىق قۇجاتسىز اۋعان ميگرانتى بار.