سولتۇستىك قازاقستان وبلىسىندا مونيتورينگىلەۋ توپتارى ءدامحانا, مەيرامحانا, توي وتكىزۋگە جالعا بەرىلەتىن كوتتەدجدەردى باقىلاۋعا العان, دەپ حابارلايدى Egemen.kz سقو پوليتسيا دەپارتامەنتىنىڭ رەسمي سايتىنا سىلتەمە جاساپ.
سقو پد باستىعىنىڭ ءبىرىنشى ورىنباسارى قانات ايتباەۆتىڭ سوزىنشە, وبلىستا قۇرامىنا ءتۇرلى مەملەكەتتىك ورگانداردىڭ 160-تان استام وكىلى كىرەتىن 24 ءموبيلدى مونيتورينگ توبى جۇمىس ىستەيدى. ونىڭ قۇرامىندا اكىمدىك, پوليتسيا وكىلدەرى جانە قوعامدىق كومەكشىلەر مەن ۆولونتەرلەر بار.
تەكسەرىستەر ءار اپتانىڭ سوڭعى كۇندەرىم - جۇما, سەنبى جانە جەكسەنبى كۇندەرى جۇرگىزىلەدى.
سقو-دا جىل باسىنان شەكتەۋ شارالارىن بۇزۋدىڭ 1059 دەرەگى انىقتالدى. ونىڭ 28-ءى سوڭعى جەتى كۇندە بولعان. انىقتالعان 1059 دەرەك بويىنشا 941 ماتەريال سقو سانيتاريالىق-ەپيدەميولوگيالىق باقىلاۋ دەپارتامەنتىنە جىبەرىلدى. 118 ماتەريال بويىنشا پوليتسيا قىزمەتكەرلەرى مالىمەتتەر جيناقتاپ جاتىر.
سانيتار دارىگەرلەر 627 اكىمشىلىك حاتتاما تولتىردى. ونىڭ 578-ءى جەكە تۇلعاعا, 30-ى زاڭدى تۇلعاعا جانە 1 لاۋازىمدى تۇلعاعا قاتىستى, 241 ماتەريال توقتاتىلدى. تاعى 27 ماتەريال مامانداردىڭ قاراۋىندا جاتىر.