قىزىلوردا وبلىسىندا تەحنيكالىق رەگلامەنت تالاپتارىنا ساي كەلمەيتىن تاماق ونىمدەرى انىقتالدى, دەپ حابارلايدى Egemen.kz قىزىلوردا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتىنە سىلتەمە جاساپ.
دەپارتامەنت شىلدە ايىندا وبلىس اۋماعىنداعى ساۋدا ورىندارىنان 136 ءونىم سىناماسىن ىرىكتەپ, زەرتحانالىق ساراپتاما جۇرگىزگەن. اتالعان ونىمدەردىڭ باسىم بولىگىن تاعام ونىمدەرىن قۇرايدى. ونىڭ ىشىندە وتاندىق, ەۋرازيالىق ەكونوميكالىق وداققا مۇشە ەلدەردە جانە وزگە ەلدەردە وندىرىلگەنى دە بار.
جۇرگىزىلگەن ساراپتامالار ناتيجەسىندە 5 سىناما تەحنيكالىق رەگلامەنت تالاپتارىنا ساي بولماي شىقتى. 4 سىنامادا فيزيكالىق-حيميالىق كورسەتكىشتەر جانە 1 سىنامادا تاڭبالاۋ تالاپتارى سايكەس كەلمەدى. سايكەسسىزدىكتەردىڭ بارلىعى تاماق ونىمدەرىنەن انىقتالدى. ونىڭ ىشىندە ەت جانە قۇس ەتى, كونديتەر ونىمدەرى, الكوگولسىز سۋسىندار بار.
«سانيتاريالىق-ەپيدەميولوگيالىق ساراپتاما قورتىندىسى بويىنشا تەحنيكالىق رەگلامەنت تالاپتارىنا ساي كەلمەيدى دەپ تانىلعان سىنامالاردىڭ بارلىعى ەۋرازيالىق ەكونوميكالىق وداققا مۇشە ەلدەردە وندىرىلگەن. اتالعان ونىمدەر بويىنشا 2 كاسىپكەرلىك سۋبەكتىسىنە قر-نىڭ حالىقتىڭ سانيتارلىق-ەپيدەميولوگيالىق سالاۋاتتىلىعى سالاسىنداعى زاڭناماسى تالاپتارىن بۇزۋشىلىقتى جويۋ جونىندەگى نۇسقامالار بەرىلدى», دەپ ءمالىم ەتتى قىزىلوردا وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى.