2021 جىلعى 19 تامىزدا شولپان-اتا قالاسىندا (قىرعىز رەسپۋبليكاسى) ەۋرازيالىق ۇكىمەتارالىق كەڭەس وتىرىسى اياسىندا قازاقستان رەسپۋبليكاسىنىڭ ەكولوگيا, گەولوگيا جانە تابيعي رەسۋرستار ءمينيسترى م. مىرزاعاليەۆ قىرعىزستان رەسپۋبليكاسىنىڭ اۋىل, سۋ شارۋاشىلىعى جانە وڭىرلەردى دامىتۋ ءمينيسترى ا. جانىبەكوۆپەن كەزدەستى, دەپ جازادى Egemen.kz.
كەزدەسۋدە سىرداريا, شۋ جانە تالاس وزەندەرىنىڭ باسسەيندەرىندە بيىلعى جىلدىڭ ۆەگەتاتسيالىق كەزەڭىنىڭ بارىسى, سونداي-اق شۋ-تالاس سۋ شارۋاشىلىعى كوميسسياسى بويىنشا ىنتىماقتاستىق شەڭبەرىندەگى وزەكتى سۋ شارۋاشىلىعى ماسەلەلەرى, ونىڭ ىشىندە شۋ وزەنىندەگى «چۋمىش» سۋ تورابىن باسقارۋ جانە پايدالانۋ رەجيمى تۋرالى كەلىسىمدى تالقىلاۋ بويىنشا كەڭەس وتكىزۋ قاجەتتىگى تالقىلاندى.
تاراپتار اۋىل شارۋاشىلىعى تاۋار وندىرۋشىلەرىن سۋارمالى سۋمەن قامتاماسىز ەتۋ بويىنشا قابىلدانعان بىرلەسكەن كۇش-جىگەردى وڭ باعالادى جانە شۋ وزەنى باسسەينىندەگى مەملەكەتارالىق وبەكتىلەر بويىنشا سۋ بەرۋدىڭ كەلىسىلگەن كەستەسىن ساقتاۋعا كەلىستى.
سونداي-اق, قازاقستاندىق تاراپ شۋ وزەنىندە سۋ ءبولۋدىڭ اشىقتىعىن قامتاماسىز ەتۋگە بايلانىستى چۋمىش گيدروتەحنيكالىق تورابىن باسقارۋ جانە پايدالانۋ رەجيمى تۋرالى كەلىسىمدى ازىرلەۋ جانە وعان قول قويۋ قاجەتتىگىن اتاپ ءوتتى. وسىعان بايلانىستى, قىرعىز تاراپىنا قۇرىلعان جۇمىس توبى شەڭبەرىندە كەلىسىم جوباسىن تالقىلاۋعا كىرىسۋدى جانە ءبىرىنشى وتىرىستى 2021 جىلعى قىركۇيەك ايىندا وتكىزۋدى ۇسىندى.
تاراپتار ءوزارا سىيلاستىق جانە تاتۋ كورشىلىك قاعيداتتارى نەگىزىندە جان-جاقتى ىنتىماقتاستىقتى تەرەڭدەتۋدى جالعاستىرادى.