سىرتقى ىستەر ءمينيسترىنىڭ ورىنباسارى اقان راحمەتۋللين ءسىم اۋعانستانداعى جاعداي بويىنشا قانداي ۇستانىمدى ۇستاناتىنىن ايتتى, دەپ حابارلايدى Egemen.kz Tengrinews.kz-كە سىلتەمە جاساپ.
ء«بىز «تاليباندى» مويىنداعان جوقپىز. كەشە قازاقستان ءسىم اۋعانستانداعى جاعداي بويىنشا رەسمي مالىمدەمە جاسادى. ءبىز اۋعانستانداعى جاعدايدى مۇقيات باقىلاۋدى جالعاستىرامىز, بۇۇ قاۋىپسىزدىك كەڭەسىنىڭ ينكليۋزيۆتى جانە وكىلدىك ۇكىمەت قۇرۋ, ۇلتتىق ازشىلىقتار مەن ايەلدەردىڭ قۇقىقتارىن قۇرمەتتەۋ, باسقا مەملەكەتتەرگە قاۋىپ توندىرەتىن توپتاردىڭ بولۋىنا جول بەرمەۋ, حالىقارالىق قۇقىقتى ساقتاۋ قاجەتتىلىگى تۋرالى مالىمدەمەسىن قولدايمىز. وسى ەرەجەلەردى ورىنداۋ اۋعانستاننىڭ جاڭا ۇكىمەتىمەن ديالوگتى باستاۋ ءۇشىن شارت بولۋى ءتيىس», دەدى ءمينيستردىڭ ورىنباسارى وكق ونلاين-بريفينگىندە.
ونىڭ ايتۋىنشا, اۋعانستان ازاماتتارى مەملەكەتتىك-قوعامدىق قۇرىلىمنىڭ ەڭ وڭتايلى مودەلىن وزدەرى انىقتاۋى كەرەك.
«قازىر كەز كەلگەن ەل «تاليبانمەن» ديپلوماتيالىق قاتىناستاردى مويىندادى نەمەسە ورناتتى دەپ ايتۋعا بولمايدى. «تاليباننىڭ» ءىس-ارەكەتتەرى ولاردىڭ مالىمدەمەسىنە قانشالىقتى سايكەس كەلەتىنىن جانە ولاردىڭ قانشالىقتى كەلىسىلەتىنىن ءبارى باقىلاۋدا», دەپ تۇيىندەدى راحمەتۋللين.