قازاقستاندا سۇرانىسقا يە كولىكتەر انىقتالدى

قازاقستاندىق اۆتوبيزنەس قاۋىمداستىعىنىڭ مالىمەتىنشە, 2021 جىلدىڭ شىلدە ايىندا جاڭا كولىكتەردىڭ ساتىلىمى ماۋسىم ايىمەن سالىستىرعاندا ءبىرشاما ازايعان. الايدا وتكەن جىلدىڭ شىلدە ايىمەن سالىستىراتىن بولساق اتالمىش كورسەتكىش 41,79%-عا جوعارى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگى حابارلادى.

جالپى الەم بويىنشا ماشينا ونەركاسىبى ءالى دە ەلەكتروندىق جيىنتىقتاردىڭ تاپشىلىعىن كورىپ وتىر. قازاقستاندىق اۆتوبيزنەس قاۋىمداستىعى ساراپشىلارىنىڭ پىكىرىنشە, الداعى ايلاردا ءالى دە اۆتوموبيل تاپشىلىعى بولادى. بۇل قازاقستانعا باعىتتالعان جەتكىزىلىمدەرگە دە اسەر ەتەدى.

قىتاي ارقىلى قازاقستاندىق جۇكتەردىڭ ءترانزيتىن شەكتەۋ ماسەلەسى دە ايتارلىقتاي قيىندىق تۋدىرىپ وتىر. بۇگىنگى تاڭدا بۇل جايت يمپورتتاۋشىلاردى دا الاڭداتادى.

2021 جىلدىڭ شىلدە ايىندا قازاقستاندىق ديلەرلەر 10 301 جەڭىل اۆتوكولىك پەن جەڭىل كوممەرتسيالىق تەحنيكا, سونداي-اق 367 جۇك كولىگى, ارنايى تەحنيكا مەن اۆتوبۋس ساتتى. جالپى جىل باسىنان بەرى 66 946 تەحنيكا ساتىلدى, بۇل 2020 جىلدىڭ قاڭتار-شىلدە ايلارىنا قاراعاندا 53,1%-عا كوپ.

شىلدە ايىندا نارىق ۇلەسىنىڭ 29% قۇرايتىن برەندتەردىڭ وندىعىن Chevrolet باستادى – 3 094, ەكىنشى ورىندا Hyundai كولىكتەرى – 2012 (ۇلەسى 18,9%). سوڭعى ەكى اي بويى ءۇشىنشى ورىندا تۇرعان Kia برەندىنىڭ – 1 216 تەحنيكاسى ساتىلعان. Toyota ديلەرلەرى شىلدە ايىندا 1 199 اۆتوكولىك ساتتى. ەڭ كوپ ساتىلاتىن برەندتەردىڭ ىشىندە بەسىنشى ورىندا LADA تۇر – 518 تەحنيكا. التىنشى ورىندا Volkswagen (448 بىرلىك), جەتىنشى ورىندا پوزيتسيالاردىڭ وزگەرۋى بايقالادى– Renault ساتىلىمى Nissan-نان اسىپ ءتۇستى (285 بىرلىك جانە 264 بىرلىك). ال, وندىقتى JAC (201 بىرلىك) جانە Haval (141 بىرلىك) قورىتىندىلايدى.

2021 جىلدىڭ شىلدە ايىنداعى ەڭ تانىمال توپ-10 مودەل: Chevrolet Cobalt – (1 555 بىرلىك), Chevrolet Nexia – (1 246 بىرلىك) جانە Hyundai Accent - (830 بىرلىك). بۇدان ءارى ءتىزىم بويىنشا: Kia Rio (662 بىرلىك), Toyota Camry (490 بىرلىك), Volkswagen Polo (323 بىرلىك), Kia Sportage (290 بىرلىك), Hyundai Creta (280 بىرلىك), Hyundai Sonata (276 بىرلىك), Toyota Rav4 (261 بىرلىك).