«بۇگىنگى شىققان بيىگىمە جەتۋىمە انام تاتيانا ارتۋروۆنا ديل مەن جاتتىقتىرۋشىم سەرگەي ۆلاديميروۆيچ ۆەرتيانكين زور ەڭبەك ءسىڭىردى», دەپ سىر اقتارادى جاس كەنشى جانە سپورتتىق اكروباتيكا شەبەرى دانيەل ديل.
«قازاقستاننىڭ 100 جاڭا ەسىمى» جوباسىنىڭ جەڭىمپازى اتانعان بۇل جاس جىگىت كەنشىلەر اۋلەتىنەن شىققان. قازىرگى ۋاقىتتا ول ي. كوستەنكو اتىنداعى شاحتادا جەراستى تاۋ-كەن جۇمىسشىسى بولىپ ەڭبەك ەتىپ ءجۇر. دانيەل اۋىر جۇمىستا جۇرگەنىنە قاراماستان, سپورتپەن تۇراقتى تۇردە شۇعىلدانۋعا دا ۋاقىت تابادى.
بەس جاسىنان باستاپ سپورتتىق گيمناستيكامەن اينالىسىپ كەلە جاتقان ول وسى سالادا تولايىم تابىستارعا قول جەتكىزگەن: حالىقارالىق دارەجەدەگى سپورت شەبەرى, ەلىمىزدىڭ بىرنەشە دۇركىن چەمپيونى جانە حالىقارالىق جارىستاردىڭ بىرنەشە مارتە جۇلدەگەرى.
جالپى, دانيەل مەن ونىڭ سەرىكتەسى – ەلىمىزدەگى سپورتتىق گيمناستيكا بويىنشا ەرلەر اراسىنداعى ەڭ ۇزدىك جۇپتىڭ ءبىرى. وسى جىلدىڭ وزىندە ولار بولگاريادا وتكەن الەم كۋبوگى سىنىنىڭ كەزەڭىندە قولا جۇلدەگە قول جەتكىزگەن.
«سپورتتىق گيمناستيكا – وتە ادەمى جانە سونىمەن بىرگە اسا قيىن سپورت ءتۇرىنىڭ ءبىرى. نەگە دەسەڭىز, جۇپتاسىپ ونەر كورسەتەتىندىكتەن وزىڭە عانا ەمەس, سەرىكتەسىڭ ءۇشىن دە جاۋاپ بەرەسىڭ. ۆاديم ەكەۋىمىز ءبىر-ءبىرىمىزدى ىممەن تۇسىنەمىز, وسىنداي سەرىكتەس تاپقانىم جولىمنىڭ بولعانى دەپ ەسەپتەيمىن», دەيدى دانيەل.
سپورتتىق گيمناستيكادان قاراعاندى وبلىسىنىڭ اعا جاتتىقتىرۋشىسى بوتاگوز بايباكۋشەۆا دانيەلدىڭ وتە ەڭبەكقور جانە شىدامدى جاس ەكەنىن ماقتانىشپەن ايتادى.
«بىزدە سپورتشىلاردىڭ كوبى قيىندىققا شىداماي, تاستاپ كەتىپ جاتادى. ال دانيەل بولسا, وتە ءتوزىمدى, الدىنا قويعان ماقساتىنا جەتپەي تىنبايتىن جىگىت. ومىردە دە ول وتە كوڭىلدى جۇرەتىن, اشىق-جارقىن ادام. قانشا جەردەن شارشاسا دا, ونىسىن ەش بىلدىرمەي, وتە سەرگەك جۇرەدى», دەيدى باپكەر.
بيىل «رۋحاني جاڭعىرۋ» باعدارلاماسى اياسىندا ۇيىمداستىرىلعان «قازاقستاننىڭ 100 جاڭا ەسىمى» بايقاۋىندا دانيەل ديل «مادەنيەت جانە سپورت» اتالىمىندا جەڭىسكە جەتتى. جاس جىگىت ءۇشىن 2790 ۇمىتكەر قاتىسقان كونكۋرستا توپ جارۋ – وتە ۇلكەن جەتىستىك.
«جاسىمنان سپورتپەن اينالىسقاندىقتان, تەمىردەي تارتىپكە ۇيرەنىپ كەتكەنمىن. بۇل داعدى ماعان ومىردە كوپ كومەگىن بەردى. ەرىنبەي ەڭبەك ەتكەن جانە قيىندىققا شىدامدى جان ءبارىن دە جەڭىپ شىعادى دەگەندى ايتقىم كەلەدى», دەيدى وزىنە-ءوزى سەنىمدى جىگىت.
اتالعان بايقاۋداعى جەڭىس جاڭا مۇمكىندىكتەردىڭ كوكجيەگىن اشۋمەن بىرگە وتە زور جاۋاپكەرشىلىك جۇكتەگەنىن ايتادى دانيەل. بۇدان بىلاي ول جاستارعا ۇلگى بولۋعا ءتيىس تۇلعا: سپورتتىڭ ادامدى مىقتى, ءتوزىمدى جانە ماقساتكەر ەتىپ شىعاراتىنىن جاس ۇرپاقتىڭ ساناسىنا ءسىڭىرۋى كەرەك. ونىڭ الدىندا وسىنداي ماقسات تۇر.
دانيەلدىڭ كەنشى بولىپ ەڭبەك ەتىپ جۇرگەنىنە بيىل ءتورت جىل بولدى. ونىڭ جەتى قات جەر استىندا جۇمىس ىستەيتىنىن ەستىگەن تانىستارى تاڭعالىستارىن جاسىرا الماي جاتادى. قۇرمەتتەرى دە زور, ارينە.
نەگىزىندە, دانيەل باعدارلاماشىلىق وقۋ بىتىرگەن بولاتىن. بىراق بولاشاق ماماندىعىن تاڭدار تۇستا ي.كوستەنكو اتىنداعى شاحتادا جۇمىس ىستەيتىن اناسىنىڭ اقىلىنا قۇلاق تۇرگەن. سپورتپەن اينالىساتىن شىمىر جانە وتە تاربيەلى جىگىتتى كورگەندە شاحتا باسشىلىعى دا بىردەن كەلىسىم بەرگەن ەدى. ءسويتىپ ول ءبىر كۇننىڭ ىشىندە كەنشى بولىپ شىعا كەلگەن.
جاس جىگىت كەيىنگى كەزدەرى قالانىڭ قوعامدىق-ساياسي ومىرىنە بەلسەندى تۇردە ارالاسا باستادى. بىلتىر Nur Otan پارتياسىنىڭ مۇشەسى رەتىندە پرايمەريزگە قاتىسىپ, ءوزىنىڭ باعدارلاماسىن جاريا ەتتى.
«مەنىڭ باعدارلامام بۇقارا اراسىندا بالالار سپورتىن ناسيحاتتاۋعا باعىتتالدى. ايماقتاردا تالانتتى بالالار وتە كوپ. بىراق كوبىنە ولاردىڭ جولىن قارجىلىق ماسەلە كەسەدى – قانداي دا ءبىر ۇيىرمەگە اقى تولەۋدى كوپ ادامداردىڭ قالتاسى كوتەرە بەرمەيدى. مەنىڭ ويىمشا, بالالار ءۇشىن سپورت ۇيىرمەلەرى قولجەتىمدى بولۋى كەرەك», دەيدى ول.
دانيەل ديل بولاشاقتا بالالارىما جاقسى اكە بولا السام, ماقساتىما جەتكەنىم دەگەن وي ايتادى.
«انام سياقتى بالاسىنىڭ تابىسقا جەتكەنىن كورگەن ادامدا ارمان بولۋشى ما ەدى؟!», دەيدى دارىندى جاس دانيەل.