ازاماتتاردىڭ اماندىعى – ەلىمىزدىڭ بايلىعى

قازىرگى كەزدە قاۋىپتى ىندەتتى جۇق­تى­رۋ دەرەگى كۇن ساناپ ارتىپ بارادى. دارىگەرلەر اۋرۋ جۇقتىرماۋدىڭ ەڭ ءتيىمدى جولى قاۋىپسىزدىك شارالارىن قاتاڭ ساقتاۋمەن قاتار, ۆاكتسينا الۋ ەكەنىن دە ايتۋدا. كوروناۆيرۋستان جازىلعانداردىڭ قاتارى دا كوبەيۋدە.

ماسەلەن, جامبىل اۋدانىنىڭ 65 جاستاعى تۇرعىنى شىلدە ايىنىڭ ورتاسىندا جامبىل وبلىستىق كوپبەيىندى اۋرۋحاناسىنىڭ جۇقپالى اۋرۋلار قۇرىلىمىنا كەلىپ تۇسكەن. وبلىستىق دەنساۋلىق ساقتاۋ باسقارماسىنىڭ مالىمەتىنشە, ناۋقاستىڭ اۋرۋحاناعا تۇس­كەن كەزدەگى جاعدايى تىم اۋىر بول­عان. وعان قوسا ناۋقاستا قانت ديابەتى, ارتەريالدى گيپەرتەنزيا جانە تىنىس الۋ جەتىسپەۋشىلىگىنىڭ 1-دارەجەسىمەن قاتار, ينتوكسيكاتسيالىق سيندرومىنىڭ بولۋىنا بايلانىستى جانساقتاۋ بولى­مىندە باقىلاۋدا بولعان. تۇرعىن اۋرۋ­حاناعا تۇسكەن كۇننەن باستاپ, تىنىس الۋ جەتىسپەۋشىلىگى 2, 3-دارەجەگە دەيىن تومەندەپ, جاساندى تىنىس الۋ اپپاراتىنا قوسىلعان. ناۋقاستىڭ جاع­دايىنا بايلانىستى دەنساۋلىق ساقتاۋ باسقارماسىنىڭ مالىمەتى بويىنشا, دەر كەزىندە جۇرگىزىلگەن كەشەندى ەمنىڭ ناتيجەسىندە پاتسيەنتتىڭ جاعدايى جاقسارعان.

«جاز مەزگىلىندە ءتورت كۇن قاتارىنان تويعا بارىپ ەدىم. بەسىنشى كۇنى دەنە قىزۋىم كوتەرىلىپ, بويىمدى السىزدىك باسىپ الدى. بۋىندارىم اۋىرا باستادى. ەل سالدىرىپ جاتقان ۆاكتسينانى دا العان جوق ەدىم. ۇيدەن دارىلەر ءىشىپ, ەكپەلەر قابىلدادىم. وزدىگىنەن جۇرگىزىلگەن ەمنەن جاعدايىم جاقسارماعان سوڭ, جەدەل جاردەم شاقىردىم. وسىلايشا اۋرۋىم ودان سايىن اسقىنىپ, جانساقتاۋ بولىمىنەن ءبىر-اق شىقتىم. مۇندا كەلگەندە دارىگەرلەر ماعان ەكى جاقتى پنەۆمونيا, وكپەنىڭ 76 پايىز قابىنۋى دەگەن دياگنوز قويدى. ەكى اپتا بويى وكپەنى جاساندى جەلدەتۋ اپپاراتىنا قوستى. دارىگەرلەردىڭ تاباندىلىعىنىڭ ناتيجەسىندە قاۋىپتى ۆيرۋستان امان قالدىم», دەيدى ناۋقاس.

سول سياقتى تاراز قالاسىنىڭ 52 جاستاعى تۇرعىنى دا جۋىردا ساۋىعىپ شىقتى. ول دا شىلدە ايىنىڭ ورتاسىندا وكپەنىڭ 90 پايىز زاقىمدانۋىمەن اۋىر حالدە اۋرۋحاناعا تۇسكەن. ەكى اپتا بويى جانساقتاۋ بولىمىندە جاتىپ, جاساندى جەلدەتۋ اپپاراتىندا بەس كۇن, وكپەنى ءينۆازيۆتى ەمەس جەلدەتۋ اپپاراتىندا ءۇش كۇن ەم قابىلداعان. قاۋىپتى ىندەتپەن ءبىر اي بويى الىسقان ازاماتتىڭ بۇگىندە جاعدايى جاقسى.

«كوروناۆيرۋس ىندەتىنە شالدىققان ناۋقاستارمەن تىكەلەي قارىم-قاتىناستا بولعان جوقپىن. دەگەنمەن ءوزىم بازاردا ساۋدا-ساتتىقپەن اينالىسامىن. ول جەردە ادام كوپ. سودان شىلدە ايىنىڭ باسىندا اۋىرىپ قالدىم. بۇل ىندەتتى مەن بازاردان جۇقتىردىم. سەبەبى قو­ناققا بارعان جوقپىز, جاقىن­دا­رىم­دى كورمەگەلى دە بىرنەشە اي بولدى. تەك تەلەفون ارقىلى حابارلاسىپ تۇرامىز. الدىمەن السىرەپ, توڭىپ, دىرىلدەي باس­تادىم. بىرنەشە كۇننەن كەيىن ءيىس پەن ءدام سەزبەي قالعانىمدا, كوروناۆيرۋس جۇقتىرعانىمدى ءتۇسىندىم. ۇيدە بىرنەشە كۇن ەمدەلگەنىممەن بولماي, جوتەل ۇدەپ, قان ارالاس قاقىرىق تۇسە بەرگەن سوڭ, جەدەل جاردەممەن اۋرۋحاناعا كەلدىم. مەن باستاپقىدا ءوز-وزىمە كەلە الماي, تىنىس الۋ اپپاراتىندا جاتتىم», دەگەن ازامات وزىنە ەكىنشى ءومىر سىيلاعان اق حالاتتى ابزال جاندارعا العىسىن ءبىلدىردى.

ءاربىر ازاماتتىڭ اماندىعى – ەلىمىز­دىڭ بايلىعى. كۇنى-ءتۇنى ءومىرىن قا­تەر­گە تىگىپ جۇرگەن دارىگەرلەردىڭ دە تىلەگى – ەلدىڭ اماندىعى. بۇل رەتتە ەمدەۋشى دارىگەر پاريدا قۇرمانباەۆا پاتسيەنتتىڭ ساۋىعۋى ءبىر عانا دارىگەردىڭ ەمەس, ناۋ­قاس­تىڭ ءوزىنىڭ ەمدەلۋگە دەگەن ىنتاسىنا دا بايلانىستى ەكەنىن ايتتى.

«كورونوۆيرۋسپەن اۋىرعان ادام بار كۇشىن وسى دەرتتى جەڭۋگە جۇمساۋى ءتيىس. اعزا السىرەپ قالادى, سوندىقتان ءوزىن-ءوزى كۇتىپ, قالىپقا كەلتىرۋ قاجەت. ول ءۇشىن توي-تومالاقتان, جيىنداردان, ادام كوپ شوعىرلاناتىن ورىنداردان باس تارتۋ كەرەك. دارۋمەنگە باي تاماقتاردى ءىشىپ, ۇيقىعا ءمان بەرگەن دۇرىس. سونىمەن قاتار تازا اۋادا سەرۋەندەۋ, سپورتپەن شۇ­عىلدانۋ, سالاماتتى ءومىر سالتىن قا­لىپ­تاستىرۋعا كوپ كوڭىل ءبولۋ كەرەك», دەيدى ول.

اۋرۋحانا قىزمەتكەرلەرى ناۋقاسىنان ايىققان ازاماتتاردى ۇيلەرىنە شىعارىپ سالۋدا. ولار ءۇشىن ءبىر ادامنىڭ ءومىرىن ارا­­شالاپ قالۋ – ۇلكەن قۋانىش. دە­گەنمەن كۇن ساناپ ءورشىپ بارا جاتقان قاۋىپتى ىندەت ادامدارعا قاۋىپ توندىرۋدە. ال اق حالاتتى ابزال جاندار بارشا ازاماتتى قاۋىپسىزدىك تالاپتارىن بارىنشا ساقتاۋعا شاقىرۋدا.