كەمىرگىشتەرمەن كۇرەس جونىندەگى اۋقىمدى ناۋقاننىڭ ەكىنشى كەزەڭى 1 قىركۇيەكتەن باستالادى, دەپ حابارلايدى Egemen.kz.
47,3 مىڭ گەكتار اۋماقتى جاپپاي دەراتيزاتسيالاۋ 1 قاراشاعا دەيىن جالعاسادى.
كەمىرگىشتەر پايدا بولۋى مۇمكىن ساياباقتار, سكۆەرلەر, وزەن جاعالاۋلارى, سونداي-اق ارىقتار, قوعامدىق كولىك ايالدامالار ارنايى زاتتارمەن وڭدەلەدى.
بۇدان بولەك, 135 مىڭ جەكە تۇرعىن ءۇيدى, ونىڭ ىشىندە شارۋاشىلىق قۇرىلىستار مەن اۋلا اۋماقتارىن وڭدەۋ جوسپارلانىپ وتىر.
قالا اكىمى باقىتجان ساعىنتاەۆتىڭ تاپسىرماسى بويىنشا دەراتيزاتسيانىڭ ەكىنشى كەزەڭى ء(بىرىنشى كەزەڭ 21 ماۋسىم مەن 28 شىلدە ارالىعىندا ءوتتى) الماتىدا بەلگىلەنگەن مەرزىمنەن بۇرىن باستالادى.
قالا باسشىسى كەمىرگىشتەر پايدا بولۋى مۇمكىن بازارلار مەن باسقا دا ساۋدا ورىندارىن دا قايتا وڭدەۋدى تاپسىردى.
ول ءۇشىن ءموبيلدى دەراتيزاتسيالىق توپتاردىڭ سانى ەكى ەسەگە – 7-دەن 14-كە دەيىن ارتتى. الماتى تۇرعىندارى ءۇشىن دەراتيزاتسياعا ءوتىنىم بەرۋگە بولاتىن ارنايى call-ورتالىق قۇرىلدى.
بايلانىس تەلەفوندارى (WhatsApp-پەن): +7 (705) 225-13-31 جانە +7 (707) 376-90-71.
بۇل رەتتە مەملەكەتتىك مەكەمەلەر مەن كاسىپكەرلىك وبەكتىلەرىنىڭ عيماراتتارىن وڭدەۋ وسى ۇيىمداردىڭ ءوز قاراجاتى ەسەبىنەن جۇزەگە اسىرىلادى.
جىل سايىن الماتىدا جۇرگىزىلەتىن دەراتيزاتسيا كەمىرگىشتەر سانىن ازايتۋ جانە ولار ارقىلى اسا قاۋىپتى ينفەكتسيالىق جانە ينۆازيالىق اۋرۋلاردىڭ تارالۋىنىڭ الدىن الۋ ءۇشىن قاجەت.