اۆتوساقتاندىرۋدىڭ قۇنى ارقالاي

قازاقستان زاڭناماسىنا سايكەس, ءاربىر كولىك يەسىنىڭ مىندەتتى اۆتو­ساق­تاندىرۋ ءپوليسى بولۋى كەرەك. بۇل – كۇتپەگەن جاعدايلار كەزىندە كولىك يەسىن قارجىلىق تۇرعى­­دان قورعاۋدى ءھام قولداۋدى قام­تا­ماسىز ەتۋ­گە بەرىلگەن كەپىلدىك. ساقتاندىرۋ ءپوليسى بولماعان جاع­دايدا ايىپپۇل سالىنادى. ايىپ­پۇل مولشەرى 10 ايلىق ەسەپتىك كورسەتكىشكە تەڭ. بۇل دەگەنىمىز – 29 170 تەڭگە.

قازاقستاندا اۆتوساقتاندىرۋ­دىڭ بىركەلكى ءتاريفى بەكىتىلمەگەن. سوندىقتان ونىڭ باعاسى ءار وڭىردە ءارتۇرلى. Freedom Finance Insurance ساقتاندىرۋ كومپانياسىنىڭ ماماندارى جۇرگىزگەن زەرتتەۋ­دە كورسەتىلگەندەي, ەڭ قىمبات ساقتاندىرۋ پوليستەرى الماتى (49,5 مىڭ تەڭگە) مەن شىمكەنت (41,3 مىڭ تەڭگە) قالالارىندا تىركەلگەن. ال ەڭ ارزان ساقتاندىرۋ پوليستەرىن اقمولا (11,4 مىڭ تەڭگە) مەن جامبىل (12,3 مىڭ تەڭگە) وبلىستارىنىڭ تۇرعىندارى پايدالانىپ ءجۇر.

ەسكە سالا كەتەيىك, كولىك قۇرال­دارى يەلەرىنىڭ ازاماتتىق-قۇ­قىق­تىق جاۋاپكەرشىلىگىن مىندەت­تى ساقتان­دىرۋ ءپوليسىنىڭ قۇنى ءار­بىر ادامعا جەكە ەسەپتەلەدى. سون­داي-اق ونىڭ قۇنى بىرنەشە فاك­تورعا تىكەلەي بايلانىستى. اتاپ ايتقاندا, ايلىق ەسەپتىك كورسەت­كىشتىڭ مولشەرى, كولىكتى باسقارۋ ءوتىلى, ءاۆتوموبيلدىڭ ءتۇرى مەن جاسى, كولىك قۇرالى تىركەلگەن ءوڭىر, اپات­تىق كوەففيتسيەنت (بونۋس-مالۋس) ەسەپكە الىنادى.

– ونلاين-ساقتاندىرۋ پايدا بولعان ساتتەن باستاپ قازاق­ستان­دىقتار ساقتاندىرۋ قۇنىن وزدەرى ەسەپتەي الاتىن مۇمكىندىككە يە. ياعني ساقتاندىرۋ اگەنتتەرىنىڭ كومەگىنسىز ءارى دەلدالسىز-اق ەسەپ-قيساپتى وزدەرى جۇرگىزە الادى. بۇل ءۇشىن ساقتاندىرۋ كومپانياسى­نىڭ سايتىنداعى اۆتوساقتاندىرۋ بولىمىنە كىرىپ, جەكە سايكەستەندىرۋ ءنومىرىن, اۆتوكولىك ءنومىرىن جانە ۇيالى تەلەفون ءنومىرىن ەنگىزۋ كەرەك. پوليس قۇنىن اۆتوماتتى تۇردە ەسەپ­تەۋ ءۇشىن اتالعان دەرەكتەر جەتكى­لىكتى, – دەيدى Freedom Finance Insurance ماماندارى.

كومپانيا وكىلدەرى الەمنىڭ بىرقاتار ەلىندەگى اۆتوساقتاندىرۋ پوليستەرىنىڭ باعاسىن دا ەسەپتەپ كورگەن ەكەن. ماسەلەن, گەرمانيادا پوليس قۇنى 150 ەۋرودان 1 مىڭ ەۋروعا دەيىن قۇبىلادى. بۇل 176-1 174 اقش دوللارىنا تەڭ. ۇلىبريتانيادا اۆتوساقتاندىرۋدىڭ ءبىر جىلداعى ورتاشا قۇنى 465 فۋنت ستەرلينگ دەپ باعالانىپ وتىر – 645 دوللار. يتاليادا ءپوليستىڭ ور­تاشا قۇنى – 500 ەۋرو – 587 دول­لار. اقش-تاعى اۆتوساقتاندىرۋدىڭ ورتا­شا باعاسى 500 دوللاردان باستالاد­ى. جاپونيادا بۇل كورسەت­كىش ءبىر جىلدىق مەرزىم ءۇشىن 117 دوللارعا تەڭ. قىتايلىقتار ءبىر جىلدىق اۆتوساقتاندىرۋ ءپوليسىن ساتىپ الۋ ءۇشىن 950 يۋان – 146 دوللار تولەيدى. رەسەيدە مىندەتتى اۆتوساقتاندىرۋدىڭ ورتاشا قۇنى 2 746-4 942 رۋبل نەمەسە 37-67 دوللار تۇرادى.