اقتوبەدە وتكەن Baqytty Bala-2021 بالالار ۆوكالدىق فەستيۆال- بايقاۋىندا الەمنىڭ جەتى مەملەكەتىنەن 10-16 جاس ارالىعىنداعى 20 ءجاسوسپىرىم سايىسقا ءتۇستى. فەستيۆال قورىتىندىسى بويىنشا بيىلعى جىلدىڭ ەڭ ۇزدىك ءانشىسى اتاعىن تاراز قالاسىنان كەلگەن جاس ونەرپاز ايلۋن زاۋشەۆا يەلەندى.
ادىلقازىلار القاسى جۇلدە قورى – 1 ملن تەڭگەگە باعالانعان گران-ءپريدى تاماشا داۋىستى ايلۋنعا بەرۋگە ءبىراۋىزدان شەشىم قابىلدادى. ءبىرىنشى ورىندى نۇر-سۇلتان قالاسىنان كەلگەن جاس ونەرپاز ادەل كۇنادىلوۆا مەن بولگاريالىق 15 جاستاعى جاس ءانشى ەليزابەت ساحاريەۆا يەلەندى. ولاردىڭ ارقايسىسىنا 500 مىڭ تەڭگەدەن تابىستالدى. قازىلار القاسى اقتاۋدان كەلگەن جاس ونەرپاز ارمەن سااكيان مەن رەسەيلىك ميلانا پونامارەنكونى ەكىنشى ورىنعا لايىق دەپ تانىپ, ولاردىڭ ارقايسىسىنا 350 مىڭ تەڭگەدەن جۇلدە تابىستادى.
ءۇشىنشى ورىندى نۇر-سۇلتان قالاسىنان كەلگەن جاس ۆوكالشى كاميلا عازيزقىزى, ەسەت ءالجان جانە ازەربايجاندىق جاس ءانشى يسكاندەر گاسانزادە يەلەندى. وسى ساناتتاعى جۇلدە قورى – 250 مىڭ تەڭگەدەن باعالانعان. پاندەمياعا قاراماستان, اقتوبەدە وتەتىن حالىقارالىق جاس تالانتتار بايقاۋىنا قاتىسۋ ءۇشىن جۇرەكتەرى لۇپىلدەپ كەلگەن بالالاردىڭ ەشبىرى قۇر كەتكەن جوق. قالاداعى «ونەر ورتالىعى» ساحناسىندا ءان ايتىپ, ۆوكالدىق شەبەرلىكتەرىن كورسەتكەندەرگە جۇلدەلى ورىنداردان وزگە بىرنەشە ىنتالاندىرۋ سىيلىقتارى تاعايىندالعان بولاتىن.
فەستيۆالدى ۇيىمداستىرۋعا اتسالىسقان ديماش قۇدايبەرگەننىڭ ارنايى سىيلىعى نۇر-سۇلتان قالاسىنان كەلگەن ادەل كۇنادىلوۆاعا تابىستالدى. ادەل ەندى ديماش قۇدايبەرگەننىڭ شەتەلدە وتەتىن كونتسەرتتەرىنىڭ بىرىنە قاتىسىپ قانا قويماي, ۇلكەن ساحنادا ديماشپەن بىرگە ءان سالماقشى. ەڭ قۇرمەتتى سىيلىققا يە بولعان 14 جاستاعى ونەرپاز ادەل قۋانىشىن جاسىرا الماي ەرەكشە شاتتاندى. وسى ساحنادا «ديماش» فان-كلۋبىنىڭ اتىنان فەستيۆالعا قاتىسۋعا كەلگەن 11 ونەرپازعا 100 مىڭ تەڭگەدەن اقشالاي سىيلىق تابىستالدى. ولاردىڭ اراسىندا ەكاتەرينبۋرگتەن كەلگەن 14 جاستاعى اننا گلوتوۆا مەن قازاقستاندىق ءالينۇر حامزين بار.
Baqytty Bala-2021 حالىقارالىق فەستيۆالىنىڭ قورىتىندى گالا كونتسەرتىنە قاتىسىپ, بالعىن جەڭىمپازداردى ارنايى قۇتتىقتاعان وبلىس اكىمى وڭداسىن ورازالين بىلاي دەدى: «قۇرمەتتى جاس ونەرپازدار! قازاقتا «الىستان التى جاسار بالا كەلسە, الپىستاعى اقساقال سالەم بەرەدى» دەگەن جاقسى ءسوز بار. بىلتىر پاندەميا كەسىرىنەن وتكىزە الماساق تا, بيىل جاقسى ءداستۇردى قايتا جالعاستىرۋعا شەشىم قابىلدادىق. بيىلعى بالالار بايقاۋى ەل تاۋەلسىزدىگىنىڭ 30 جىلدىعىنا ارنالادى. ۇلان-عايىر جەردىڭ يەسى, بىرنەشە مىڭداعان جىل بويى دالامىزدىڭ مادەنيەتىن ساقتاپ قانا قويماي, الەمگە پاش ەتىپ كەلگەن كوشپەندىلەردىڭ ۇرپاعى رۋحاني باي مۇرامىزدى الداعى ۋاقىتتا دا تانىستىرا بەرەمىز. شەتەلدەردەن دە وسى بالالار فەستيۆالىنە قاتىسۋعا ىنتا بىلدىرگەندەر جىل سايىن ارتىپ كەلەدى. Baqytty Bala-2021 ءان مەرەكەسى جاس تالانتتار ۇستاحاناسىنا اينالىپ كەلەدى دەپ ايتۋعا تولىق نەگىز بار. بۇل تاماشا ونەر سايىسى جاس تالانتتاردى اشىپ كەلەدى. بولاشاقتا سىزدەردىڭ ارالارىڭىزدان الەمدىك تانىمال فەستيۆالداردىڭ بولاشاق ۇزدىكتەرىن كورەمىز دەپ ۇمىتتەنەمىز. وسى فەستيۆالدى وتكىزۋگە باستاما كوتەرگەن «ديماش الي» ستۋدياسى بولسا, جاس تالانتتار بايگەسىن ۇيىمداستىرۋعا بارىنشا اتسالىسىپ جۇرگەن ديماش قۇدايبەرگەندى ەرەكشە اتاپ وتكىم كەلەدى. حح عاسىردا قازاق مۋزىكا ونەرىن عىلىمي اينالىمعا ءتۇسىرىپ, كاسىبي مۋزىكا سالاسىن جولعا قويعان احمەت جۇبانوۆ بولسا, ءححى عاسىرداعى قازاقتىڭ انشىلىك الەۋەتىن دۇنيەجۇزىنە تانىتقان – ديماش قۇدايبەرگەن. جان-جاقتان جينالعان بالالاردىڭ دوستىق مەكەنىنە اينالعان بۇل جوبانىڭ ۇزدىكتەرى ءالى دە كوبەيەرى انىق. بارلىق قاتىسۋشىلاردى شىن جۇرەكتەن قۇتتىقتايمىز!».
فەستيۆال قورىتىندىسى بويىنشا مادەنيەت جانە سپورت مينيسترلىگىنىڭ ارناۋلى سىيلىقتارى اتىراۋلىق ءامينا قۇربانوۆا مەن قىزىلوردالىق تيمۋر تيانعا تابىستالدى. وسى نوميناتسيا بويىنشا ءامينا «استانا وپەرا» ستۋدياسىندا ءان جازۋعا, تيمۋر تيان بەينەبايان ءتۇسىرۋ مۇمكىندىگىنە يە بولدى. اقتوبەلىك جاس ءانشى يسلام قىستاۋباەۆ نۇر-سۇلتان قالاسىنداعى دارىندى بالالارعا ارنالعان «شابىت» مەكتەبىنە قابىلداناتىن بولدى. ءانشى پروديۋسەر ۇ.جولداسوۆتىڭ اۆتورلىق ءانىن ەندىگى جەردە حالىقارالىق سايىستاردا يسكاندەر گاسانزادە ورىندايدى. سونداي-اق تۇركىستاننان كەلگەن جاس ونەرپاز مەيرامبەك شالقاربايعا «ديماش ءالي» پروديۋسەرلىك ورتالىعىنىڭ ساۋندپروديۋسەرى ەرلان بەكچۋريننىڭ ارنايى سىيلىعى تابىستالدى. «سلاۆيان بازارى» فەستيۆالىنىڭ باس جۇلدە يەگەرى رۋحيا بايدۋكەنوۆانىڭ 100 مىڭ تەڭگە كولەمىندەگى اقشالاي سىيلىعىن جانە «حالىقارالىق كوكجيەك» نوميناتسياسىن گرەتسيادان كەلگەن جاس ونەرپاز سوفيا سالۆاريدۋ مەن ۋكراينالىق كريستينا دۋشۋتينا الدى.
فەستيۆالدىڭ جابىلۋ ساتىنە ارنالعان گالا-كونتسەرتتە ايگەرىم تىلەۋبەك, ديماش قۇدايبەرگەن, ەرجان ماكسيم, رۋحيا بايدۇكەنوۆا, قاراقات باشانوۆا ونەر كورسەتتى.
اقتوبە وبلىسى